“თუ დამქირავებელი ქირას არ გადაიხდის მას აღსრულების ეროვნული ბიურო გამოასახლებს” – იუსტიციის მინისტრის ინიციატივა

რამდენიმე დღის წინ იუსტიციის მინისტრმა რატი ბრეგაძემ “მინისტრის საათის” ფორმატის ფარგლებში გამოსვლისას განაცხადა, რომ ქირით შესული ადამიანების ბინიდან გაყვანის პრობლემა აქტუალურია და ამიტომაც, ახალ ინიციატივაზე მუშაობენ.

კერძოდ, მომხმარებელს შესაძლებლობა მიეცემა, ქირავნობის ხელშეკრულება საჯარო რეესტრში დაარეგისტრიროს, სადაც მითითებული იქნება, რომ თუ მოქირავნე ვალდებულებას არ შეასრულებს და თანხას არ გადაიხდის, მას აღსრულების ეროვნული ბიურო გამოასახლებს.

“ამ შემთხვევაში მესაკუთრის უფლებები დაცული იქნება. ეს სასამართლოს გადაწყვეტილების გარეშე მოხდება და ამაზე მხარეები წინასწარ იქნებიან შეთანხმებულები. თუ მხარეები გადაწყვეტენ, მსგავსი ტიპის ხელშეკრულება გააფორმონ, ისინი დაცულები იქნებიან და მათი საკუთრების უფლება ქმედითად რეალიზებული იქნება.” – თქვა რატი ბრეგაძემ.

ინიციატივას ძალიან დიდი გამოხმაურება მოჰყვა და როგორც მოქალაქეები ამბობენ, პრობლემაც მართლაც მასშტაბურია. ხშირია შემთხვევები, როდესაც პირი ქირას აღარ იხდის და არც ბინას ტოვებს. როგორც წესი, ასეთ დროს, სასამართლოს მიმართავენ, რაც ვადებში ძალიან იწელება და ბინის მესაკუთრეები ზარალდებიან.

აღნიშნულ ინიციატივასთან დაკავშირებით აღსრულების ეროვნულ ბიუროს დავუკავშირდით. მოქალაქეებს აინტერესებთ, როდიდან ამოქმედდება ცვლილება.

როგორც აღსრულების ეროვნულ ბიუროში განგვიცხადეს, ეს ჯერჯერობით ინიციატივაა, რომელიც საქართველოს პარლამენტს უნდა წარედგინოს და უცნობია, საბოლოოდ, როდიდან ამოქმედდება.

გარდა ამისა, აღსრულების ეროვნულ ბიუროში გვითხრეს, რომ ეს მათი ერთ-ერთი სერვისი იქნება და მოქალაქეებს სარგებლობა ნებაყოფლობით, ორმხრივი შეთანხმების საფუძველზე შეეძლებათ.

თუ გამქირავებელიც და ბინის მესაკუთრეც დადებენ ქირავნობის ხელშეკრულებას და დამქირავებელი პირობებს დაარღვევს, არ გადაიხდის თანხას, მაშინ ბინის მესაკუთრე აღსრულების ეროვნულ ბიუროს მიმართავს, რომელიც სპეციალურ საბუთს გამოსცემს და პროცედურას დაიწყებს. ბინის მესაკუთრეს საკუთარი უფლების დაცვა სასამართლოს გზით აღარ მოუწევს.

ასევე, ჯერჯერობით უცნობია, რა ეღირება ქირავნობის ხელშეკრულების საჯარო რეესტრში დარეგისტრირება, სადაც აღნიშნული პუნქტიც ჩაიწერება. არც ისაა ცნობილი, მსგავსი ხელშეკრულების დადების შემდეგ, ბინის მესაკუთრეს ქირიდან მიღებული შემოსავლიდან ხომ არ მოუწევს რაიმე პროცენტის გადახდა.

როგორც იუსტიციის მინისტრმა განაცხადა, ინიციატივას უახლოეს მომავალში პარლამენტს წარუდგენენ და შესაბამის ცვლილებაზე იმსჯელებენ.