თურქეთში საქართველოს საელჩო ეძებს ბათუმიდან მოხალისედ წასულ დანიელ ბულკაშვილს, რომელიც მეგობრებისა და ახლობლების ცნობით, თურქეთში დამანგრეველი მიწისძვრის შემდეგ, სამაშველო ღონისძიებებში მონაწილეობდა.
სოციალურ ქსელში, მეგობრების მიერ გავრცელებული ინფორმაციის თანახმად, მოხალისედ წასული დანიელი, სამაშველო ოპერაციისას, ნანგრევებში მოყვა და დაიღუპა.
საქართველოს საგარეო საქმეთა სამინისტრო დანიელ ბულკაშვილის გარდაცვალების ფაქტს, ამ ეტაპზე, ვერ ადასტურებს.
როგორც უწყებაში ეუბნებიან რადიო თავისუფლებას, ამ დროისთვის, თურქეთში საქართველოს საელჩოში აღნიშნული ფაქტის შესახებ არც თურქეთის ოფიციალური უწყებებიდან და არც საქართველოს მოქალაქის ოჯახის წევრების მხრიდან შეტყობინება არ შესულა:
„საელჩო აგრძელებს თურქეთის შესაბამის უწყებებთან ინფორმაციის მოძიების პროცესს“, – გვეუბნებიან საგარეო საქმეთა სამინისტროში.
დანიელ ბულკაშვილის დაღუპვის შესახებ ცნობები სოციალურ ქსელში 21 თებერვალს გავრცელდა. მაგრამ ოჯახის წევრები ამ თემაზე კომენტარს არ აკეთებენ.
როგორც ახლობლები ამბობენ ის უკრანის ომშიც იყო მოხალისედ , მაგრამ შვილსი ჯანმრთელობის მდგომარეობის გაუარესების გამო უკან დაბრუნდა.
Loading ...