თურქეთმა დაადასტურა ახალი კორონავირუსით დაავადების პირველი შემთხვევა

თურქეთის ჯანდაცვის სამინისტრომ დაადასტურა ქვეყანაში კორონავირუსით COVID-19 ადამიანის დაავადების პირველი შემთხვევა.

თურქული მედია ჯანდაცვის მინისტრზე დაყრდნობით იუწყება, რომ ვირუსით ინფიცირებულია თურქეთის მოქალაქე მამაკაცი, რომელიც ცოტა ხნის წინ ევროპიდან დაბრუნდა. ის კარანტინის რეჟიმში იმყოფება.

11 მარტის დილის მონაცემებით, მსოფლიოს 115-ზე მეტ ქვეყანაში ახალი სახეობის კორონავირუსით დაავადდა 119 217 ადამიანი. გარდაიცვალა 4299. გამოჯანმრთელდა 66 561.

დაავადების(80778) და გარდაცვალების(3158) შემთხვევების უმრავლესობა მოდის ჩინეთზე, საიდანაც ვირუსის გავრცელება დაიწყო. ჩინეთში გამოჯანმრთელდა 61 486 ადამიანი.

მეორე ადგილზეა იტალია, სადაც 11 მარტის დილის მონაცემებით, დაავადდა 10 149 და გარდაიცვალა 631 ადამიანი. გამოჯანმრთელდა 1004.

მესამე ადგილზე ირანია, სადაც ოფიციალური მონაცემებით, დაავადდა 8042 და გარდაიცვალა 291 ადამიანი. გამოჯანმრთელდა 2731.

კორონავირუსით დაავადების და გარდაცვალების შემთხვევების რაოდენობით, მეოთხე ადგილზეა სამხრეთ კორეა. მას მოსდევენ საფრანგეთი, ესპანეთი, გერმანია და აშშ.

11 მარტის დილის მდგომარეობით, საქართველოში ლაბორატორიულად დადასტურებულია დაავადების სულ 23 შემთხვევა. პაციენტებს შორის ერთი ბავშვია.