თურქეთი COVID19-ის გამო დაწესებულ შეზღუდვებს კიდევ უფრო ამსუბუქებს, აღნიშნულის შესახებ ქვეყნის პრეზიდენტმა რეჯეფ თაიფ ერდოღანმა განაცხადა.
ერდოღანის თქმით, ხვალიდან, 10 ივნისიდან გარკვეულწილად მოიხსნება 65 წელს ზემოთ ასაკის პირთათვის სახლიდან გასვლაზე დაწესებული შეზღუდვა. მათ სახლების დატოვების საშუალება ექნებათ 10:00 საათიდან 20:00 საათამდე.
კინოთეატრები, თეატრები და საქორწილო დარბაზები გაიხსნება 1-ელი ივლისიდან, ხოლო რესტორნებსა და კაფეებს შეეძლებათ იმუშაონ შუა ღამემდე, ანუ, ორი საათით მეტი, ვიდრე ეს აქამდე იყო დაშვებული.
ამასთან, როგორც მინისტრთა კაბინეტთან შეხვედრის შემდეგ, ერდოღანმა განაცხადა, მისი მთავრობა ხელს შეუწყობს დასაქმების სტიმულირებას და ეკონომიკის ზრდას.
როგორც ცნობილია, თურქეთში შეზღუდვების ნაწილი 1-ელ ივნისს მოიხსნა, რომლის თანახმადაც შიდა გადაადგილებაზე დაწესებული შეზღუდვები მოიხსნა, გაიხსნა კაფეები, რესტორნები, პარკები და სპორტული ობიექტები.
ცნობისთვის, თურქეთში, გასულ დღე-ღამეში კორონავირუსის 933 ახალი შემთხვევა დაფიქსირდა. საერთო ჯამში ქვეყანაში ვირუსის 172 000 დადასტურებული შემთხვევაა, გარდაიცვალა 4 700 ადამიანი.
Loading ...