თურქეთის საგარეო საქმეთა მინისტრი – ის, რაც ახლა ხდება, არ არის რამდენიმე საჰაერო დარტყმა, სიტუაცია უკრაინაში ოფიციალურად ომია – ჩვენ განვახორციელებთ „მონტრეს კონვენციას”

თურქეთმა პირობა დადო, რომ განახორციელებს საერთაშორისო პაქტის ნაწილებს, რომლებიც პოტენციურად შეზღუდავს რუსული ხომალდების ხმელთაშუა ზღვიდან შავ ზღვაში შესვლას.

Reuters-ის ინფორმაციით, ამის შესახებ თურქეთის საგარეო საქმეთა მინისტრმა, მევლუთ ჩავუშოღლუმ განაცხადა. ამასთან, სააგენტო წერს, რომ უკრაინაში რუსეთის შეჭრის შემდეგ პირველად ნატო-ს წევრმა თურქეთის წარმომადგენელმა უკრაინის წინააღმდეგ თავდასხმას ომი უწოდა.

„ის, რაც ახლა ხდება, არ არის რამდენიმე საჰაერო დარტყმა, სიტუაცია უკრაინაში ოფიციალურად ომია. ჩვენ განვახორციელებთ „მონტრეს კონვენციას“, – აღნიშნა მევლუთ ჩავუშოღლუმ.

ამასთან, მან განმარტა, რომ თურქეთს არ შეუძლია შავ ზღვაში შესვლაში ხელი შეუშალოს რუსეთის ყველა გემს, ვინაიდან, კონვენციის თანახმად, არ შეიძლება იმ გემების შეკავება, რომლებიც საკუთარ ბაზებზე ბრუნდებიან.

მანამდე კიევმა მიმართა ანკარას, დაებლოკა რუსული ხომალდების შავ ზღვაში შესვლა, საიდანაც მოსკოვმა უკრაინის სამხრეთ სანაპიროზე შეჭრა დაიწყო. მიმდინარე თვეში ამ მარშრუტით აკვატორიაში გადაადგილდა რუსეთის მინიმუმ ექვსი სამხედრო ხომალდი და ერთი წყალქვეშა ნავი.