“თითოეულ დღეს აქვს მნიშვნელობა, ქვეყანა დროულად უნდა დატოვოს” – ალტერნატიული კომისიის წევრები სააკაშვილის ჯანმრთელობის მდგომარეობის შესახებ

ალტერნატიული კომისიის წევრების განცხადებით საქართველოს მესამე პრეზიდენტის, მიხეილ სააკაშვილის ჯანმრთელობის მდგომარეობა კვლავ მძიმეა. ისინი  ამბობენ, რომ მას რამდენიმე დაავადება აქვს, რომელიც ერთმანეთისგან გამომდინარეობს.

ექიმების თქმით, ვითარებიდან ერთადერთი გამოსავალი მიხეილ სააკაშვილის საზღვარგარეთ სამკურნალოდ გადაყვანაა.

“დაწყებულია ძალიან მძიმე შეუქცევადი ცვლილებები. ლოგიკურია, რომ დღეს უკვე უნდა იყოს ბევრად უფრო მძიმე ვითარება, ვიდრე იყო ორი კვირის წინ თავისთავად ცხადია, ამიტომ თითოეულ დღეს აქვს მნიშვნელობა. გამოსავალი გახლავთ ის, რომ პაციენტს დროულად მიეცეს საშუალება დატოვოს ქვეყნის ფარგლები”, – თქვა ექიმმა, ლალი ჯავაშვილმა.

მიხეილ სააკაშვილის ჯანმრთელობის მდგომარეობას გუშინ ევროკავშირის ელჩი, კარლ ჰარცელი გამოეხმაურა. ელჩის თქმით, საქართველოს ხელისუფლებამ უნდა აიღოს პასუხისმგებლობა იმაზე, რომ მიხეილ სააკაშვილს შესაბამის ჯანდაცვაზე წვდომა ჰქონდეს.

ცნობისთვის, ცენტრი “ემპათია” მიხეილ სააკაშვილის ჯანმრთელობის მდგომარეობაზე ერთიან დასკვნას ამზადებს. ჯერჯერობით უცნობია, როდის გამოქვეყნდება დოკუმენტი.