თენგიზ ცერცვაძე – იმდენად სერიოზული არხებია ჩართული მოლაპარაკებებში, რომ ვფიქრობ, საქართველოში ვაქცინა ერთ თვეში შემოვა

მთავარი მომენტი ის არის, რომ იყოს მაღალი ხარისხის ვაქცინა და შემოვიდეს ადრე, – ამის შესახებ საქართველოს პირველ არხს თბილისის ინფექციური საავადმყოფოს გენერალურმა დირექტორმა, თენგიზ ცერცვაძემ განუცხადა.

მისი თქმით, საქართველო პრაქტიკულად ყველა ვაქცინის შემოტანაზე მუშაობს.

„მათ შორის, „ფაიზერი“, „მოდერნა“, ოქსფორდისა და ჩინური ვაქცინები და ა.შ. ყველა მიმართულებით მიდის მუშაობა და მოლაპარაკებები, მაგრამ ყველაზე რეალური ჩანს ამ ორი ვაქცინის შემოტანა. ესენია: „ასტრაზენეკას“ წარმოების და მეორე ერთ-ერთი ჩინური ვაქცინა. მთავარი მომენტი ის არის, რომ იყოს მაღალი ხარისხის ვაქცინა და შემოვიდეს ადრე. იმიტომ, რომ ოფიციალური არხებით, კოვაქსპლატფორმის რიგი გვიან მოუწევს საქართველოს და ამდენი ხანი არ გვინდა დაცდა. პირდაპირი მოლაპარაკებები მიმდინარეობს ამ მწარმოებელ ქვეყნებთან“, – განაცხადა თენგიზ ცერცვაძემ.

მისივე თქმით, საქართველოს ამ პროცესში ძალიან ეხმარებიან ჯანდაცვის მსოფლიო ორგანიზაციის გენერალური მდივანი და ორგანიზაციის ევროპის ბიუროს დირექტორი. პროცესში, ასევე, ჩართულნი არიან იმ ქვეყნების ელჩები, რომელი ქვეყნებიც არიან მწარმოებლები.

თენგიზ ცერცვაძის განმარტებით, ყველაზე მეტი ალბათობაა „ასტრაზენეკასა“ და ჩინური ვაქცინის შემოტანის. თბილისის ინფექციური საავადმყოფოს დირექტორის განცხადებით, ორივე ვაქცინა ძალიან კარგია.

„მათ, „ფაიზერისა“ და „მოდერნას“ ვაქცინებთან შედარებით, აქვთ ის სერიოზული უპირატესობა, რომ არ საჭიროებენ შენახვას სპეციალური რეჟიმით. ეს ვაქცინები ჩვეულებრივ ტემპერატურაზე ინახება და ამიტომ მათი ტრანსპორტირება და მოხმარება გაცილებით უფრო იოლია, ვიდრე იმ ორი ვაქცინის. მათ საიმედოობისა და დაცვის ისეთივე პროცენტი უჩვენეს, დაახლოებით 95 პროცენტამდე, როგორც „ფაიზერმა“ და „მოდერნამ“. თუ ამ ორი ვაქცინიდან რომელიმე შემოვა, მე პირადად მივესალმები ამას. ლაპარაკია, რაც შეიძლება ჩქარა შემოვიდეს. არავინ იცის, ზუსტად როდის შემოვა, მაგრამ ჩემი ვარაუდით, იმდენად სერიოზული არხებია ჩართული ამ მოლაპარაკებებში, რომ ვფიქრობ, ერთ თვეში შემოვა“, – აღნიშნა თენგიზ ცერცვაძემ.