უკრაინაში შეჭრის შემდეგ მოკლული და დაჭრილია 75 000-ზე მეტი რუსი სამხედრო. გამოცემა New York Times-ის და ტელეკომპანია CNN-ის ცნობით, ეს ინფორმაცია აშშ-ის პრეზიდენტის ადმინისტრაციის წარმომადგენლებისგან დახურულ შეხვედრაზე მიიღეს კონგრესის წარმომადგენელთა პალატის წევრებმა. ერთ-ერთმა მათგანმა, შეიარაღების საკითხთა კომიტეტის დემოკრატმა წევრმა ელისა სლოტკინმა CNN-ს უთხრა, რომ რუსეთის სახმელეთო ჯარების 80%-ს ძალა გამოცლილი აქვს, მაგრამ „ისინი მაინც რუსი სამხედროები არიან“.
სლოტკინის ინფორმაციით, დახურულ შეხვედრაზე საუბარი იყო უკრაინისთვის შემდგომი სამხედრო დახმარების სწრაფად გაწევის საკითხზეც. კონგრესის წარმომადგენელთა პალატის წევრის თანახმად, დემოკრატებიც და რესპუბლიკელებიც მხარს უჭერენ უკრაინისთვის შორ მანძილზე მოქმედების რაკეტების(ATACMS) გადაცემას.
გასულ კვირაში, აშშ-ის ცენტრალური სადაზვერვო სამმართველოს დირექტორმა, უილიამ ბერნსმა კოლორადოს შტატის ქალაქ ასპენში, უსაფრთხოების ფორუმზე გამოსვლისას განაცხადა, რომ უკრაინაში მოკლულია 15 000-მდე რუსი სამხედრო, დაჭრილთა რიცხვი კი, დაახლოებით სამჯერ მეტია. ბერნსის თქმით, შედარებით ნაკლები, თუმცა, მნიშვნელოვანი დანაკარგები აქვს უკრაინასაც.
უკრაინაში შეჭრის შემდეგ, რუსეთის თავდაცვის სამინისტრომ მხოლოდ ერთხელ, მარტის ბოლოს განაცხადა, რომ უკრაინაში დაღუპულია 1351 რუსი სამხედრო. უკრაინის შეიარაღებული ძალების გენერალური შტაბის მიერ 27 ივლისს განახლებული მონაცემებით, რუსეთის არმიამ 40 070 სამხედრო დაკარგა. კიევი ოფიციალურად არ ავრცელებს ცნობებს ომში დაღუპული და დაჭრილი უკრაინელი სამხედროების შესახებ.
www.radiotavisupleba.ge
Loading ...
