თაღლითობა, რომელშიც არაერთი მოქალაქე უკვე გაება

კოტეჯი წყნეთში, მცხეთაში, ციხისძირში, გონიოში, მისი ერთი დღით დაქირავების ფასი კი მხოლოდ 100 ლარი – სოციალურ ქსელში ერთი შეხედვით, საკმაოდ მიმზიდველმა განცხადებებმა არაერთი მომხმარებელი თაღლითობის მსხვერპლი გახადა.

როგორც ერთ-ერთი დაზარალებული „პალიტრავიდეოსთან“ ჰყვება, განცხადების შემდეგ თანხა წინასწარ ჩარიცხა, თუმცა ადგილზე მისულს კოტეჯი არ დახვდა. მეტიც, ადგილობრივებისგან შეიტყო, რომ მსგავსი ობიექტი არც არასდროს ყოფილა. როგორც გაირკვა ის მხოლოდ ერთ-ერთია იმ ათობით დაზარალებულს შორის, რომლებმაც აღნიშნული გვერდისგან არარსებული კოტეჯი იქირავეს.

როგორც დაზარალებულის მონათხრობიდან ირკვევა, აღნიშნულ გვერდზე, სხვა კოტეჯების ფოტოებსა და ვიდეოებს იყენებენ, პოტენციურ კლიენტებს ძირითადად სოციალური ქსელის მეშვეობით ეკონტაქტებოდნენ და ჯავშნებსაც სოციალური ქსელიდან იღებდნენ.

მათთან დაკავშირება „პალიტრავიდეომაც“ სცადა, თუმცა რაც თაღლითური სქემის შესახებ ინფორმაცია გავრცელდა, შეტყობინებებს აღარ პასუხობენ.

კოტეჯების დაქირავების შესახებ შეთავაზებები ასევე ხელმისაწვდომია ამ გვერდის ტიკ-ტოკ პლატფორმაზეც, სადაც 47 000 ზე მეტი გამომწერი ჰყავთ და კლიენტებს კოტეჯებს მცხეთაში, წყნეთში, ქედაში ციხისძირში, გონიოში, ბეშუმსა და ხულოში სთავაზობენ. აღსანიშნავია, რომ ყველა განცხადებაზე კომენტარების ველი გათიშულია.

როგორც „პალიტრავიდეო“ აღნიშნავს, დაზარალებულებმა სამართალდამცავებს მიმართეს, თუმცა ამ დრომდე პასუხი არ მიუღიათ.

www.bpn.ge