თამარ ჩერგოლეიშვილი – სალომე ზურაბიშვილს გადავეცით რეჟიმის უკანონო დავალებათა შემსრულებლების სია

პარტია ფედერალისტების ერთ-ერთი ლიდერის, თამარ ჩერგოლეიშვილის თქმით, პარტიამ საქართველოს მე-5 პრეზიდენტს, სალომე ზურაბიშვილს იმ თანამდებობის პირთა სია გადასცა, ვინც ივანიშვილის რეჟიმის უკანონო დავალებებს ასრულებს და სისტემატურად არღვევს მოქალაქეების უფლებებს.

თამარ ჩერგოლეიშვილის თქმით, თავისუფლების ინსტიტუტისა და ფედერალისტების ერთობლივი მონაცემებით, სიაში ჯამში 100-ზე მეტი ადამიანია.

“ვეხმაურებით პრეზიდენტის გუშინდელ ინიციატივას, რომლის მიხედვითაც პოლიტიკურ ჯგუფებს პოლიტიკურ პარტიებს გვთხოვა, რომ მათთვის გადაგვეცა ის მონაცემები, რასაც ფედერალისტები უკვე დიდი ხანია ვაგროვებთ.

ჩვენ ამ ხნის განმავლობაში მოვაგროვეთ 57 მსხვერპლის საქმეში ჩართული 22 მოსამართლის, 14 პროკურორის და 91 პოლიციელის შესახებ ინფორმაცია.

ესენი არიან ადამიანები იმ თანამდებობის პირები, რიგითები, რომლებიც ასრულებენ რეჟიმის უკანონო დავალებებს და სისტემატურად არღვევენ პროტესტის მონაწილეების უფლებებს მათი დაკავებისას თუ ჩხრეკისას და დღეს ჩვენ ვაწვდით ამ მონაცემებს, ჯამში 100-ზე მეტი ადამიანია.

მონაცემების შეგროვება გრძელდება, თავისუფლების ინსტიტუტი და ფედერალისტები მოვუწოდებთ ყველას, ვისი უფლებაც დაირღვა, რომ მოგვაწოდონ ინფორმაცია იმ პროკურორების, გამომძიებლების, მოსამართლეების და რიგითი პოლიციელების შესახებ, რომლებიც მათი დაკავებისას ან ჩხრეკისას მათ უფლებებს არღვევდნენ იმიტომ, რომ ერთადერთი პროპორციული ძალა, რაც ჩვენ შეგვიძლია რეჟიმის წინააღმდეგ მათ ცვლილებამდე გამოვიყენოთ არის ჩვენი პარტნიორების დახმარება, რომ მათ დაუწესდეთ შეზღუდვები – როგორც სავიზო, ისე ფინანსური შეზღუდვები და ამოცანი არის, რომ დავიცვათ პროტესტი იმიტომ, რომ პროტესტი არის ის, რაც ქმნის კრიზისის განცდას ამ ქვეყანაში და ის უნდა გაგრძელდეს იმისთვის, რომ დემოკრატიულ ცვლილებებს მივაღწიოთ”. – თქვა თამარ ჩერგოლეიშვილმა.

www.tabula.ge