ჯანდაცვის მინისტრის მოადგილის თამარ გაბუნიას განცხადებით, უპირველეს ყოვლისა, გრიპის საწინააღმდეგო ვაქცინა მაღალი რისკ ჯგუფების მქონე ადამიანებისთვის იქნება ხელმისაწვდომი. როგორც მან „პალიტრა ტვ“-ს გადაცემაში “აქტუალური თემა” განმარტა, ასეთ ჯგუფებს მიეკუთვნებიან ადამიანები, რომლებსაც აქვთ ქრონიკული დაავადებები, შაქრიანი დიაბეტი ან სხვა ისეთი დაავადება, რომელიც მათ იმუნურ სისტემას ასუსტებს.
„როგორც წესი, სტანდარტულად სახელმწიფო გრიპის საწინააღმდეგ ვაქცინას სთავაზობს მაღალი რისკის მქონე პირებს, ამაში შედიან პაციენტები, რომელთაც აქვთ ქრონიკული დაავადებები, შაქრიანი დიაბეტი ან სხვა ისეთი დაავადება, რომელიც მათ იმუნურ სისტემას ასუსტებს. ასევე შედიან ტუბერკულოზის მქონე პირები ან სხვა ისეთი დაავადების, რომელსაც განსაკუთრებული მეთვალყურეობა სჭირდება. ასევე არიან პროფესიული ჯგუფები, სამედიცინო პერსონალი ან ის პირები, ვისაც უხდებათ სამედიცინო დაწესებულებებში მუშაობა, სამედიცინო პერსონალის გარდა. წლევანდელი კრიტერიუმები ზუსტდება და ჩვენ მოკლე ხანში გვექნება უკვე ზუსტი ჩამონათვალი იმ ჯგუფების, ვისაც პრიორიტეტულად შევთავაზებთ უფასო ვაქცინას. თუმცა, ის მაღალი რისკის ჯგუფების მიმართ იქნება მიმართული ისევე, როგორც ეს გასულ წლებშიც იყო“,-განაცხადა გაბუნიამ.
მისი განმარტებით, მოქალაქეებმა ოჯახის ექიმს უნდა მიმართონ იმისთვის, რომ გაიგონ, როდის და სად შეძლებენ აცრის ჩატარებას. თამარ გაბუნიას განმარტებით, აღნიშნულ საკითხთან დაკავშირებით ყველა დეტალი ძალიან მალე გაჟღერდება.
როგორც ჯანდაცვის მინისტრის მოადგილე აცხადებს, ეს 4 კომპონენტიანი ვაქცინაა, რომელიც დაავადებათა კონტროლის ეროვნულმა ცენტრმა შეისყიდა.
„135 ათასი ვაქცინა უკვე გარანტირებულად შეძენილი გვაქვს და ჩამოდის. გარდა ამისა, საერთაშორისო ორგანიზაციებთან გრძელდება მოლაპარაკებები. ქვეყნებს, რომლებიც წინასწარ აკეთებენ შეკვეთებს, ხშირად რჩებათ ვაქცინის ჭარბი ოდენობა, რომელიც მათთვის საჭირო აღარ არის და შესაძლებელი ხდება მათი სხვა ქვეყნებზე გადანაწილება. მოლოდინის რეჟიმში ვართ, რომ დამატებით 100 ათასი დოზა მაღალი ხარისხის ვაქცინა, რომლის შეძენა გვინდა, ჩვენთვისაც ხელმისაწვდომი გახდება“,-განაცხადა გაბუნიამ.
www.interpressnews.ge
Loading ...