![](https://guria.tv/wp-content/uploads/2023/11/თამაზ-გინტური.png)
თამაზ გინტურის ძმის, ნიკოლოზ გინტურის თქმით, ოჯახის მიერ მისი ძმის სავარაუდო მკვლელების დასახელების შემდეგ, ერთ-ერთმა მათგანმა, ვასილ დემიდოვმა სახელი შეიცვალა.
“დემიდოვმა, როგორც ვიცი, და სანდო წყარომ მომაწოდა ინფორმაცია, გვარი და სახელი შეიცვალა. სად არის და როგორ არის, არ ვიცი. მე ვთხოვ ჩვენს ხელისუფლებას, გადმოსცენ და გაასამართლონ ჩვენს მხარეზე, პირველ რიგში დემიდოვი. მაგათთან ერთად ბევრი ჯარისკაცი იყო, სულ ცოტა ათი-თორმეტი”. – თქვა ნიკოლოზ გინტურმა ფორმულასთან ინტერვიუში.
ნიკოლოზ გინტურმა ასევე აღნიშნა, რომ სავარაუდო მკვლელების დასახელების შემდეგ, იგი საგამოძიებო უწყებაში ხვალ, 15 ნოემბერს დაიბარეს.
“ოფიციალური უწყება ყოველდღე მირეკავს – როდის მოიცლი, როდის ჩამოხვალ? მე შეთანხმებული ვარ, ხვალ უნდა ჩავიდე, ხვალ უნდა დამკითხონ და ამის მერე გაცნობებთ ყველაფერს”. – ამბობს გინტური.
“თამაზ გინტური ყოველთვის, თითქმის კვირაში 3-ჯერ ადიოდა ლომისის ეკლესიაში, ლოცულობდა, მოდიოდა და ბრუნდებოდა. ლომისიდან წამოსული მიდიოდა მშობლების საფლავზე, სანთლებს ანთებდა და თავისთავად ძალიან დაღონებული იყო, ბოლო ხანებში, რაც გაიგო, რომ ლომისის კარები იჭედება, მას მერე ცუდად ხდებოდა, ცუდად მოქმედებდა მის გულზე – “ლომისა აგვიჭედესო” სულ ამას იძახდა. როდესაც თამაზი მშობლების საფლავზე იყო და მოდიოდა სახლში, ავიდა ლომისაში, დახვდა ლომისის კარები აჭედილი, შემოუარა ეკლესიას, შეაღო კარები, სანთელი დაანთო, გამოვიდა, გამოსვლის დროს დახვდნენ, ჩასაფრება მოუწყვეს რუსმა ოკუპანტებმა და ჩაცხრილეს უკნიდან“, – თქვა გივი გინტურმა.
6 ნოემბერს რუსეთის საოკუპაციო ძალებმა გორის მუნიციპალიტეტში, სოფელ კირბალის მიმდებარედ საქართველოს მოქალაქე, თამაზ გინტური მოკლეს, ხოლო ლევან დოთიაშვილი გაიტაცეს.