“თავისუფლება მზია ამაღლობელს” – ჟურნალისტი ვლადიმერ მენაბდე ორი დღეა ოზურგეთში მხარდამჭერ აქციას მართავს

ჟურნალისტი ვლადიმერ მენაბდე უკვე მეორე დღეა ოზურგეთში აქციას მართავს.

„გურიის მოამბის“ დამფუძნებელი „ბათუმელების“ და „ნეტგაზეთის“ დამფუძნებელს მზია ამაღლობელს თანადგომას ამ ფორმით უცხადებს და მის გათავისუფლებას ითხოვს. კოლეგის მხარდასაჭერად _ ის ბანერით ხელში გზის პირას დგას. „გუშინ, ვიმყოფებოდი ოზურგეთის-ქობულეთის ავტომაგისტრალის ექადია-ლიხაურის მონაკვეთზე. დღეს ვართ ოზურგეთის-ჩოხატაურის მაგისტრალის დვაბზუს მონაკვეთზე. მთავარი მესიჯია თავისუფლება მზიას და ვითხოვთ აუცილებლად მის გათავისუფლებას“, _ ამბობს ვლადიმერ მენაბდე – „შემდეგ იქნება ბათუმი, თბილისი… ასევე, მოვივლით ყველა სოფელსა და დასახლებას გურიაში. ვისაც არ შეგიძლიათ თბილისში ან სხვაგან წასვლა, გამოდით საკუთარი სახლების წინ, დღეში თუნდაც 5 წუთი, ტრანსპარანტებით _ „თავისუფლება მზია ამაღლობელს“ „თავისუფლება სინდისის პატიმრებს“. გაიგონ, რომ ყველგან ვართ და მოსვენებას არ მივცემთ რუს ოკუპანტებს“, _ აღნიშნულია ვლადიმერ მენაბდის მიერ გავრცელებულ ინფორმაციაში.