ისრაელის პრეზიდენტმა, მსოფლიო ჰოლოკოსტის ფორუმის ფარგლებში, პირველი ორმხრივი შეხვედრა დღეს საქართველოს პრეზიდენტთან, სალომე ზურაბიშვილთან გამართა. საქართველოს პრეზიდენტმა ისრაელის პრეზიდენტს ისრაელის გავლენებისა და ურთიერთობების გამოყენება სთხოვა, რათა ისრაელმა შეახსენოს მათ, რომ საქართველოს მცოცავი ოკუპაცია ვერასოდეს წაადგება მშვიდობას რეგიონში.
თავის მხრივ კი, ისრაელის პრეზიდენტმა სთხოვა საქართველოს პრეზიდენტს საქართველოს მეგობარ ქვეყნებთან ურთიერთობისას რეგიონული უსაფრთხოების ჭრილში ყურადღება გაამახვილოს უსაფრთხო ისრაელის მნიშვნელობაზე.
იერუსალიმში გამართულ ორმხრივ შეხვედრაზე პრეზიდენტებმა ხალხებს შორის განსაკუთრებულ, გულწრფელ და მეგობრულ ურთიერთობებზე ისაუბრეს. როგორც ისრაელის პრეზიდენტმა განაცხადა, ხალხებს შორის ეს გულწრფელი და მართალი მეგობრობა საუკუნეების განმავლობაში დადასტურებული მეგობრობაა.
აღინიშნა, რომ საქართველო და ისრაელი ურთიერთობის სხვა ფაზაში გადადიან, რომელსაც უფრო მეტი ისრაელელი ეცნობა და რომლის ბაზისიც შექმნილია საქართველოში მცხოვრები ებრაელების და ქართველების ურთიერთობით.
ხაზი გაესვა იმ გარემოებას, რომ ანტისემიტიზმის საშინელი ტალღის პერიოდში, რომელიც ევროპას და მსოფლიოს დაატყდა თავს, საქართველო ებრაელებისათვის თავისუფლების კუნძული აღმოჩნდა. მეორე მსოფლიო ომის დროს, საქართველო ბევრი ებრაელისათვის თავშესაფარი გახდა და ებრაელობას არ ახსოვს საქართველოში რაიმე სახის შევიწროება და დევნა.
Loading ...