ზუგდიდში პოლონეთში მოკლული ქალის ცხედარი ჩამოასვენეს

პოლონეთში მოკლული ახალგაზრდა ქალის ცხედარი ზუგდიდის სოფელ დარჩელში, მშობლიურ სახლში გამთენიისას ჩამოასვენეს. გარდაცვლილის ოჯახი ითხოვს მცირეწლოვანი ბავშვების ჩამოყვანაში დახმარებას. მათ დედასთან ერთად, 11 ივნისის ბილეთები ჰქონდათ დაჯავშნილი.
კიდევ ერთი მოთხოვნაა, მამას ჩამოერთვას შვილებზე მეურვეობის უფლება და მოკლული ქალის ოჯახს დაეკისროს.
“ყველას ვთხოვ, დაგვეხმარონ შვილიშვილების ჩამოყვანაში. მას ყველანაირი უფლებები უნდა ჩამოერთვას. ის შვილების გამზრდელია?”, – ამბობს მოკლულის მამა, თემურ ყალიჩავა.
ოჯახი ასევე ითხოვს გარდაცვლილის ქმრის უმკაცრესად დასჯას.
ახალგაზრდა ქალი პოლონეთში მოკლული იპოვეს. აღნიშნულ საქმეზე მისი ქმარია ბრალდებული.
მოკლული ზუგდიდელი ქალის საქმეზე, ორგანიზაცია “საფარი” პოლონეთს ევროსასამართლოში უჩივლებს. ორგანიზაციის იურისტი თამარ ლუკავა მოკლულის ოჯახში იმყოფებოდა. მისი განცხადებით, პოლონეთის პოლიცია გულგრილად მოეკიდა ამ საქმეს, არ შეასრულა მასზე დაკისრებული ვალდებულება და არაერთი მიმართვის მიუხედავად, არ დაიცვა ქალის სიცოცხლის უფლება.

www.livepress.ge