ზუგდიდში აქცია – “ბრძოლა გამარჯვებისთვის, ბრძოლა მიშას თავისუფლებისთვის” მიმდინარეობს

ზუგდიდში ენმ-ის ორგანიზებით საპროტესტო აქცია მიმდინარეობს სახელოწოდებით – “ბრძოლა გამარჯვებისთვის, ბრძოლა მიშას თავისუფლებისთვის”. შეკრებილთა მთავარი მოთხოვნა საქართველოს მესამე პრეზიდენტის, მიხეილ სააკაშვილის გათავისუფლებაა, რომელიც მათი მტკიცებით, უკანონოდ დააკავეს. აქციაზე მონაწილეები საქართველოს დროშებით მივიდნენ. ამასთან, ყოფილმა ძალოვნებმა საქართველოს დროშა მუსიკის ფონზე შემოიტანეს.

აქციაზე, შეკრებილებს ენმ-ის წევრმა მაია კალანდიამ, ყოფილი პრეზიდენტის, მიხეილ სააკაშვილის წერილი წაუკითხა. ექსპრეზიდენტი ამბობს, რომ უკვე მერამდენედ, საქართველოს გათავისუფლება სამეგრელოდან იწყება. მის მიმართვას “ლაივპრესი” უცვლელად გთავაზობთ:

“როდესაც დავბრუნდი საქართველოში, პირველად ჩემი დედულეთის, ჩემი სამარგალოს ჰაერი ჩავისუნთქე. ეს იყო ნისლიანი ჰაერი პალიასტომის ტბისა, ჰაერი ჯადოსნურად ლურჯი ტობავარჩხილისა, ჰაერი მაცოცხლებელი ლუგელასი, ჰაერი ხიბულასი, რომელმაც გულში ჩაიკრა ჩვენი პირველი პრეზიდენტი. ჰაერი გოროზი ნოქალაქევის, ჰაერი დიდი კონსტანტინეს პატარა აბაშის, და რა თქმა უნდა, ჰაერი ჩემი საყვარელი ანაკლიის და ლეგენდარული რუხის ციხის. ჰაერი მხარის, სადაც ყოველი კუთხე-კუნჭული ფეხით ბევრჯერ მაქვს შემოვლილი. თავისუფლების ეს ჰაერი ჩემი ციხის დაბურულ ფანჯარაშიც კი აღწევს. ის მოქრის ჩემი საყვარელი ჩელას მხარიდან. ყოველთვის მაოცებდა ამ მხარის, უძველესი კოლხეთის და მისი ხალხის სილამაზე და სიმამაცე. და უკვე მერამდენედ, საქართველოს გათავისუფლება სამეგრელოდან იწყება.

იცით, ამ ჰაერს კიდევ რა ჰქვია? ეს თავისუფლების ჰაერია. ზუსტად ვიცი, რომ თქვენ იქნებით კოლონის სათავეში, რომელიც სრულიად საქართველოს გაათავისუფლებს და გამათავისუფლებს მეც.

კანონზომიერია, რომ პირველებმა სწორედ თქვენ ჩაუშალეთ ამ მოძალადე მთავრობას მცდელობა, მხედრიონის ტიპის სადამსჯელო ოპერაცია ჩაეტარენინათ სამეგრელოში. პირველებმა თქვენმა პოლიციელებმა ამოიღეს ხმა. მე ვარ პუტინის პირადი პატიმარი, ვინაიდან მინდოდა ლაზიკა, მინდოდა მდიდარი საქართველო, მინდოდა მომეცა თქვენთვის წარმატება და მომავალი. ლაზიკა აუცილებლად აშენდება. ჩემი ოცნების ქალაქი, როგორც ზუგდიდის გაგრძელება რაც პირეოსია ათენისთვის, როგორც დუბაი და სინგაპური.

საქართველოა კავკასიის და მთელი შავიზღვისპირეთისთვის რეგიონის მთავარი ცენტრი, სადაც მინიმალური ხელფასი იქნება 1000 დოლარი. მე თქვენებური ვარ და როცა საკუთარი ნებით შევდიოდი პუტინის და ივანიშვილის ციხეში, კარგად მახსოვდა, რომ ჩვენ ცოტნე დადიანის შთამომავლები ვართ და ცოტნე დადიანის სისხლი გვიდუღს ძარღვებში. გეხვევით ყველას. მიყვარხართ. შეხვედრამდე ძალიან მალე, გამარჯვებული საქართველოს დედაქალაქში.

აბა ულა (აბა წინ)”, – აცხადებს მიხეილ სააკაშვილი.

წყარო: www.livepress.ge