![d897013ac2fafc7e9d99b0e40f988ff3](/images/d897013ac2fafc7e9d99b0e40f988ff3.jpg)
„ჩემთვის 26-ე გამოშვება. უცნაური დღევანდელი მდგომარეობის გამო და არა მხოლოდ. არ ირეკება ბოლო ზარი, არ ვწერ კეთილ სურვილებს მოხატულ პერანგებზე, რაც ყოველთვის გულისამაჩუყებელი იყო და ცრემლებს მგვრიდა. დღეს ეს განცდა არ მაქვს. პირიქით, ვფიქრობ და მიხარია, რომ მომავალ სასწავლო წელს მათ გარეშე შევხვდები (რა თქმა უნდა, უმრავლესობას არ ეხება). ზოგიერთი მათგანის სახელი და გვარის ხსენებაც მზარავს. თუმცა მყავს ფავორიტებიც. ჩემ ანდრიას, დათუნას, გიგას, სანდროს, ბადუკას, ვანოს ვუსურვებ წარმატებებს, წინსვლას ცხოვრებაში. თუ 18 წლის არ ვარგიხარ, ვერც 78-ის ივარგებ. თქვენ უკვე ხართ 18 წლის, ხართ კარგი ადამიანები, კაცური კაცები“, – ეს არის ტექსტი მასწავლებლის პოსტიდან, რომელიც მან უკვე აბიტურიენტებს მიუძღვნა.
![4d1fdee467ccd6d670e5b9e83463192f](images/4d1fdee467ccd6d670e5b9e83463192f.jpg)
ეს პოსტი ხათუნა ქვარცხავამ გამოქვეყნებიდან მალევე, დირექტორის მოთხოვნით წაშალა, თუმცა მოზარდების ნაწილმა მისი კოპირება და სოციალურ ქსელში გავრცელება მოასწრო.
მასწავლებელის მიერ მოსწავლეების ასეთ შეფასებას, სამწუხარო ფაქტი უწოდა სკოლის დირექტორმა ნინო გოგინავამ. მან „ლაივპრესს“ განუცხადა, რომ ხათუნა ქვარცხავას საქციელს გამართლება არ აქვს:
„როგორც დირექტორი, არანაირად არ ვაღიარებ და არ ვიწონებ არც ამ პოსტს და არც ამ საქციელს. ამას გამართლება არ აქვს. ამაზე ორი აზრი არ არსებობს. ამას არანაირად არ ვეთანხმები. ეს საკითხი გადაეცა სკოლის დისციპლინურ კომიტეტს, რომელიც მას განიხილავს უკვე ორშაბათს და მიეცემა კანონის შესაბამისი მსვლელობა“, – გვითხრა ნინო გოგინავამ.
რა სანქციები შეიძლება გატარდეს მასწავლებლის მიმართ, სკოლის დირექტორი ამბობს, რომ დამოკიდებულია დისციპლინურ კომიტეტზე, რომლის წევრიც თავად არ არის. დარწმუნებულია, რომ „დამოუკიდებელი კომიტეტის“ გადაწყვეტილება იქნება სამართლიანი და ობიექტური:
„მერწმუნეთ, დისციპლინურ კომიტეტში არიან ადამიანები, მასწავლებლები, რომლებიც თავიანთ აზრს, დამოკიდებულებას სამართლებრივ საფუძველზე დაყრდნობით, სამართლებრივ კანონზომიერებაზე დაყრდნობით, ჯეროვნად შეაფასებენ ამ ფაქტს და მიიღებენ გადაწყვეტილებას“, – აღნიშნა მან.
ფეისბუკზე ასევე ვრცელდება მოზარდების პოსტებიც, სადაც გმობენ ქიმიის მასწავლებლის მხრიდან მოსწავლეების დაყოფის ფაქტს.
www.livepress.ge