უკრაინის პრეზიდენტის, ვოლოდიმირ ზელენსკის განცხადებით, უკრაინის შეიარაღებულმა ძალებმა ერთ დღეში ორი რუსული საბრძოლო თვითმფრინავი გაანადგურეს, რომელთაგან ერთი საზღვაო დრონის საშუალებით ჩამოაგდეს, ხოლო მეორე ოკუპირებულ ყირიმში არსებულ სამხედრო ობიექტებზე მიტანილი იერიშებით გაანადგურეს.
“საზღვაო დრონით რუსული საბრძოლო თვითმფრინავის ჩამოგდება ბრწყინვალე იყო – უკრაინის შესაძლებლობების დამადასტურებელი. ჩვენმა არმიამ ძალზედ ზუსტი იერიში მიიტანა ყირიმში არსებული სამხედრო სამიზნეების წინააღმდეგ. ეს კიდევ სხვა არის, ერთ დღეში განადგურებული მეორე რუსული საბრძოლო თვითმფრინავი”. – თქვა უკრაინის პრეზიდენტმა ყოველდღიურ ვიდეომიმართვაში.
ზელენსკის თქმით, უკრაინული ძალების მიერ 3 მაისს ოკუპირებულ ყირიმზე მიტანილი იერიშების შედეგად, განადგურებულია რუსების სამხედრო საწყობებიც.
“მადლობას ვუხდი ჩვენს ბიჭებს, რომლებიც უკრაინის შორი რადიუსის [იერიშების] შესაძლებლობებს აუმჯობესებენ – როგორც ცაში, ისე ზღვაში. […] ყველას, ვინც უკრაინას ოკუპანტისგან თავის დაცვაში ეხმარება და ყველას, ვინც უკრაინისთვის ახალ ტექნოლოგიურ შესაძლებლობებს ქმნის და ავითარებს – მადლობას გიხდით”. – დაამატა ზელენსკიმ.
ცნობისთვის, 3 მაისს უკრაინულმა ძალებმა ისტორიაში პირველად ჩამოაგდო რუსული ავიაგამანადგურებელი საზღვაო დრონით.
დრონმა, რომელიც R-73-ის ტიპის საჰაერო რაკეტებით იყო აღჭურვილი, $50 მილიონის ღირებულების რუსული SU-30 ტიპის ავიაგამანადგურებელი ნოვოროსიისკის პორტთან ახლოს ჩამოაგდო.
“ეს არის პირველი შემთხვევა მსოფლიოში, როდესაც საბრძოლო თვითმფრინავი საზღვაო დრონით იქნა განადგურებული”. – წერია უკრაინის თავდაცვის სამინისტროს დაზვერვის მთავარი სამმართველოს განცხადებაში.
www.tabula.ge
Loading ...