უკრაინის პრეზიდენტმა ვოლოდიმირ ზელენსკიმ განაცხადა, რომ სწორედ უკრაინის შეიარაღებული ძალები აიძულებენ რუს ოკუპანტებს შეამცირონ საომარი მოქმედებები კიევისა და ჩერნიგოვის მიმართულებით.
„დარწმუნებული ვარ, დღეს ნახეთ ახალი ამბები იმის შესახებ, რომ რუსეთის სამხედრო უწყებამ თითქოს გადაწყვიტა შეემცირებინა საომარი მოქმედებები კიევისა და ჩერნიგოვის მიმართულებით, იგივე შეიძლება ითქვას ჩერნობაევკაზე, თითქოს რუსულმა ავიაციამ უბრალოდ გადაწყვიტა ნაკლები იფრინოს და რუსულმა ტექნიკამ კი ნაკლები იაროს. ყველას მადლიერი ვარ – ჩვენი დამცველების, ყველას, ვინც უზრუნველყოფს კიევის დაცვას. სწორედ მათმა მამაცმა და ეფექტურმა ქმედებებმა აიძულა მტერი ამ მიმართულებით უკან დაეხია“, – განაცხადა ზელენსკიმ ვიდეომიმართვაში.
ამასთან, მან ხაზგასმით აღნიშნა, რომ სიფხიზლე არავინ არ უნდა დაკარგოს, რადგან სიტუაცია არ გამარტივებულა.
”გამოწვევების მასშტაბები არ შემცირებულა. რუსეთის არმიას ჯერ კიდევ აქვს მნიშვნელოვანი პოტენციალი განაგრძოს თავდასხმები ჩვენი სახელმწიფოს წინააღმდეგ. ამიტომ, ჩვენ არ უნდა შევამციროთ ჩვენი თავდაცვითი ძალისხმევა, როგორც ჩვენი ქვეყნის ჩრდილოეთით, ასევე უკრაინის ყველა სხვა რეგიონში, სადაც დროებით შევიდნენ რუსული ჯარები“, – აღნიშნა უკრაინის პირველმა პირმა.
Loading ...
