ვლადიმერ პუტინი გაეროს გენმდივანს – ჩვენ ჯერ კიდევ ველით და ვიმედოვნებთ, რომ შევძლებთ შეთანხმებების მიღწევას დიპლომატიური არხით

ჩვენ ჯერ კიდევ ველით და ვიმედოვნებთ, რომ შევძლებთ შეთანხმებების მიღწევას დიპლომატიური არხით, – ამის შესახებ რუსეთის პრეზიდენტმა ვლადიმერ პუტინმა გაეროს გენერალურ მდივანს განუცხადა.

კრემლის ლიდერმა დასძინა, რომ რომ ბოლო მოლაპარაკებებმა სტამბოლში “გარღვევას” მიაღწია, თუმცა მას შემდეგ შეფერხდა, რაც უკრაინის ქალაქ ბუჩაში მშვიდობიანი მოსახლეობის წინააღმდეგ განხორციელებული სისასტიკის შესახებ ინფორმაცია გავრცელდა.

პუტინის თქმით, აღნიშნული პროვოკაცია იყო და მასთან “რუსეთის არმიას არავითარი კავშირი არ აქვს”.

რუსეთის პრეზიდენტმა განაცხადა, რომ უკრაინასთან მოლაპარაკებები გრძელდება და იმედოვნებს, რომ ის დადებით შედეგს გამოიღებს.

კრემლის ლიდერის თქმითვე, უკრაინასთან მოლაპარაკებები ონლაინ ფორმატში გაგრძელდება.

გარდა ამისა, პუტინმა “რთული და ტრაგიკული” უწოდა მარიუპოლში არსებულ ვითარებას და დასძინა, რომ ალყაში მოქცეულ ქალაქში რუსული სამხედრო ოპერაციები აღარ მიმდინარეობს.