„ვიყიდი, გამიუქმდება, ვიყიდი, გამიუქმდება“… როდის აღდგება საჰაერო მიმოსვლა?

უკვე შეიცვალა გეგმები ისრაელთან დაკავშირებით, საიდანაც ტურისტების მიღებას პირველ რიგში ვარაუდობდნენ. ქვეყნის შიგნით ეპიდსიტუაციის გაუარესების გამო, პირდაპირი ფრენების აღდგენაზე ისრაელი თავად ამბობს უარს. აქვე უნდა ვთქვათ, რომ ვიზიტორების რაოდენობა ისრაელიდან 2019 წელს სიდიდით მეექვსე ადგილას იყო, აზერბაიჯანის, რუსეთის, სომხეთის, თურქეთისა და ევროკავშირის ქვეყნების შემდეგ.

„ისრაელიდან ბევრი გვწერს. აგვისტოში, სექტემბერში უნდათ ჩამოსვლა, მაგრამ ჯერ არაფერი ვიცით – ან კოვიდ პასპორტი როგორი უნდა იყოს, ან სხვა რეგულაციები. ალბათ, 20 ივლისისთვის უფრო ვიქნებით მზად ტურისტების მისაღებად. აქაც ბევრია ჩარჩენილი, ვისაც წასვლა უნდა და, სავარაუდოდ, პირველი სპეციალური რეისებით ეს ხალხი დაბრუნდება სამშობლოში“, – ამბობს ტურისტული კომპანია Flytravel – ის მენეჯერი, კახა ჯიმშაშვილი.

მისი თქმით, პირდაპირი რეისების აღდგენამდე ისრაელის მოქალაქეები საქართველოში ჩამოსვლას კიევის ან ბაქოს გავლით გეგმავენ, თუმცა ამ ეტაპზე არც უკრაინასთან და არც აზერბაიჯანთან საქართველოს საჰაერო მიმოსვლა აღდგენილი არ აქვს.

„ჩვენი კომპანია ევროკავშირის ქვეყნების ტურისტებზე მუშაობს. ევროკავშირმა ჯერ მხოლოდ შიდა საზღვრები გახსნა და პლუს ქვეყნები, რომლებშიც საქართველო არ მოიაზრება. ანუ ფრენები თუნდაც იყოს, ეს არ ნიშნავს, რომ ჩვენი ტურისტი ჩამოვა“,  – ამბობს ტურისტული კომპანია „ჯორჯიან ჰოლიდეის“ დირექტორი, მანანა ცირამუა.

ტურისტული კომპანიების ზარალი დღითი დღე იზრდება. Flaytravel-ი იძულებული გახდა გამოცდილი თანამშრომლები დაეთხოვა და ძვირადღირებული ოფისიც შეეცვალა. „ჯორჯიან ჰოლიდეი“ კი, ოქტომბრიდან მოყოლებული, შემოსავლის გარეშეა. „ზარალი ძალიან დიდია“, – აცხადებენ კომპანიაში.

www.radiotavisupleba.ge