დღეიდან, პენსია და შშმ პირთა სოციალური გასაცემლები იზრდება. ამას ითვალისწინებს 2025 წლის სახელმწიფო ბიუჯეტი, რომელიც საქართველოს პარლამენტმა დაამტკიცა.
2025 წლის სახელმწიფო ბიუჯეტის მიხედვით, საპენსიო უზრუნველყოფაზე 4.498 მილიარდი ლარი დაიხარჯება. ბიუჯეტის განმარტებით ბარათში აღნიშნულია, რომ ეს რიცხვი 2024 წლის დამტკიცებულ გეგმასთან შედარებით 568.0 მლნ ლარით არის გაზრდილი, ხოლო ბიუჯეტის წინა წარდგენასთან შედარებით – 78,0 მლნ ლარით, რაც გამოწვეულია, მათ შორის, საპენსიო ასაკის მოსახლეობისათვის „სახელმწიფო პენსიის შესახებ“ საქართველოს კანონით გათვალისწინებული სახელმწიფო პენსიის ზრდის ინდექსაციის წესის შესაბამისად, ეკონომიკურ პარამეტრებზე დაყრდნობით პენსიის გადაანგარიშებით.
ბიუჯეტის საბოლოო დოკუმენტის მიხედვით, მიმდინარე წლიდან:
- 70 წლის და მეტი ასაკის პენსიონერთა პენსია 35 ლარით 450 ლარამდე იზრდება. ამავე კატეგორიის პენსიონერთა პენსია მაღალმთიან დასახლებებში თითქმის 540 ლარს გაუტოლდება;
- 70 წლამდე პირთა პენსია, სამთავრობო პროგრამის შესაბამისად ასევე 35 ლარით 350 ლარამდე , ხოლო მაღალმთიან დასახლებებში 420 ლარამდე იზრდება.
- გარდა პენსიისა, გათვალისწინებულია შეზღუდული შესაძლებლობის პირთა სოციალური გასაცემლის ზრდა 35 ლარით;
ბიუჯეტის პირვანდელი პროექტით 70 წლამდე პირებისთვის ასაკობრივი პენსია 2025 წლიდან 335 ლარი უნდა ყოფილიყო, რაც 2024 წელს არსებულ პენსიასთან შედარებით 20 ლარით მეტია. 2019 წლიდან მოყოლებული ქვეყანაში ასაკობრივი პენსიის ზრდა მიბმულია სპეციალურ ფორმულაზე, 70 წლამდე პირებისთვის ესაა მხოლოდ ბოლო 12 თვის საშუალო ინფლაციაზე მიბმული, ხოლო 70 წელს ზემოთ პირებისთვის კი პენსიის ყოველწლიური გადახედვა მიბმულია როგორც ბოლო 12 თვის ინფლაციაზე, ასევე ბოლო 4 კვარტალის საშუალო ეკონომიკურ ზრდაზე. ამასთან, მთავრობა იღებს ვალდებულებას, რომ 70 წლამდე პირებისთვის პენსია ყოველწლიურად მინიმუმ 20 ლარით გაზარდოს, ხოლო 70 წელზე უფრო ხანდაზმულებისთვის კი პენსია ყოველწლიურად არანაკლებ 35 ლარით უნდა გაიზარდოს.
საქართველოში ასაკობრივ პენსიას სულ 838 ათასი მოქალაქე იღებს.
www.bm.ge
Loading ...
