“ვისაც წელს კარგი ხარისხის თხილი ექნება, მაღალ შემოსავალსაც მიიღებს” – ასოციაცია

“ის ფერმერები, ვისაც წელს კარგი ხარისხის თხილი ექნება, მაღალ შემოსავალს მიიღებენ”, – ამის შესახებ bm.ge-ს თხილის მწარმოებელთა ასოციაციის აღმასრულებელი საბჭოს თავმჯდომარემ მერაბ ჭითანავამ განუცხადა.

როგორც მან აღნიშნა, თხილზე ფასების დადგენა 15 ივლისიდან 20 ივლისამდე პერიოდში მოხდება.

“ვისი თხილის გულის გამოსავლიანობაც 42% იქნება, ვისი თხილის ფარული სიდამპლეც 2-3%-ზე დაბალი იქნება, ისინი გარანტირებულად მაღალ შემოსავალს მიიღებენ და არანაკლებს, ვიდრე შარშან. ველოდებით, რომ თურქეთის სააგენტო ფასებს 15-დან 20 ივლისამდე გამოაცხადებს, რაც მსოფლიო ფასების ჩამოყალიბებას ბიძგს მისცემს და ეს განსაზღვრავს ფასებს.

მაღალი ხარისხის პროდუქცია ცალსახად მაღალ ფასში გაიყიდება, დამპალ თხილს არც შარშან ჰქონდა ფასი, არც წელს ექნება და არც მომავალ წელს. ამიტომ, ფერმერებმა ბაღებს უნდა მოუარონ. შესაწამლი პროდუქციის ფასი არ გაზრდილა და 200-ლარიანი პაკეტია, რაც ფერმერს შესაძლებლობას მისცემს შეწამლონ პროდუქტი.” – აღნიშნა მერაბ ჭითანავამ.

www.bm.ge