სამოქალაქო მოძრაობამ ”თავისუფლებისთვის” მორიგი სანფორმაციო შეხვედრა ოზურგეთის მუნიციპალიტეტის სოფელ გურიანთაში გამართა. მოძრაობის წევრი გრიგოლ მახარაძე ახალგაზრდებს შეხვდა და მათ საქართველოს ისტორიის კონკრეტული მონაკვეთის შესახებ ესაუბრა. ახალგაზრდებისთვის საინტერესო აღმოჩნდა იმის გაგება, რომ პეტრე ნაკაშიძე, რომელსაც ილია ჭავჭავაძემ პოემა ”მეფე დიმიტრი თავდადებული” მიუძღვნა, წარმოშობით სოფელ გურიანთიდან იყო და მას თერგდალეულთა მოძრაობის ფორმირებასა და რუსეთის საპირისპირო, საქართველოსთვის სრულიად ლეგიტიმური განწყობების გაღვივებაში, საკუთარი წვლილი მიუძღვის.
მარიამ კვაჭანტირაძე: მე პირადად ისტორია ძალიან მაინტერესებს, მაგრამ სკოლაში ასეთი რამ არ ისწავლება, ეს საკითხი ჯერ არ შემხვედრია. თუ მომდევნო კლასებში გვასწავლიან, ძალიან კარგი იქნება, რადგან თითქმის არაფერი ვიცოდი, რაც ახლა განვიხილეთ. ძალიან საინტერესო იყო.
გრიგოლ მახარაძე, სამოქალაქო მოძრაობა ”თავისუფლებისთვის’‘ – ვხვდებით გურიის სხვადასხვა სოფელში მოსახლეობას, მათ შორის, ბავშვებს, ახალგაზრდებს. ვესაუბრებით გურიის წარსულზე, კონკრეტულ მოვლენებზე, ისტორიულ პირებზე. რომლებიც თავიანთი საქმიანობით ხელს უწყობდნენ რუსეთის იმპერიასთან დაპირისპირებას, სხვადასხვა ფორმით, იქნებოდა ეს რევოლუციაში ჩართულობა, საგანმანათლებლო საქმიანობა და სხვა. ამ პროექტის მიზანია ახალგაზრდებს მეტი ინფორმაცია ჰქონდეთ, მეტის წაკითხვის და მოძიების სურვილი გაუჩნდეთ. უფროს ადამიანებთან ვცდილობთ რომ მეტი ვისაუბროთ დღევანდელ პოლიტიკურ მოცემულობაზე, საქართველოს საგარეო პოლიტიკაზე, ევროკავშირის სასარგებლოდ არჩევანის გაკეთებაზე და ა.შ.
სამოქალაქო მოძრაობა ”თავისუფლებისთვის” მსგავს საინფორმაციო შეხვედრებს კვლავ აგრძელებს. გურიანთის შემდეგ მორიგი შეხვედრა სოფელ ძიმითში ჩატარდა.
კომენტარები
Loading ...