ვინ ითხოვს საქართველოდან აშშ-ში თავშესაფარს ყველაზე ხშირად?

ბოლო პერიოდში ამერიკის შეერთებულ შტატებში პოლიტიკური თავშესაფრის მოთხოვნის შემთხვევები საქართველოდან მკვეთრად გახშირდა, განსაკუთრებით კი „აზრის გამო დევნის“ მოტივით. ამის შესახებ ნიუ-იორკში რეგისტრირებული იურიდიული ფირმა EK LAW OFFICE-ის თანადამფუძნებელმა, იურისტმა ეკატერინე ეგუტიამ BMGtv-ის გადაცემა „წერტილში“ განაცხადა.

მისი თქმით, თავშესაფრის მაძიებელთა შორის გამოირჩევიან კონკრეტული ჯგუფები: ყოფილი საჯარო მოხელეები, მედიის წარმომადგენლები, სამართალდამცავი ორგანოების ყოფილი წარმომადგენლები.

“სრულიად განსხვავებულია სიტუაცია, შესვლის ფორმის მიხედვით. საემიგრაციო სტატუსის მოპოვებისთვის, ეს ძალიან მნიშვნელოვანია. როგორც კი უკანონო გზით, შეპარვით შედიხარ

როდესაც შემოდიხარ ოფიციალურ გამშვებ პუნქტზე და ითხოვ თავშესაფარს, ან ჯერ ვიზით შემოდიხარ [აშშ-ში] ეს არის ლეგიტიმურად შემოსვლა და შემდეგ, უკვე შესაძლებელია სხვა სტატუსზე ფიქრი, ან სტატუსის შეცვლა და ა.შ. გააჩნია, რა საფუძვლები აქვს პირს, მაგრამ მათთვის ყველა შემთხვევაში უფრო იოლია. ანუ, ისინი არ ექვემდებარებიან ასე დეპორტაციას, იმიტომ, რომ ისინი შტატებში მოხვდნენ ლეგიტიმური გზით. შემდგომ, ასეთ პირებზე მიმდინარეობს გრძელვადიანი პროცესი. მაგალითად, პირი შევიდა ვიზით აშშ-ში, მერე განიზრახა, თავშესაფარი მოითხოვოს, რადგან აღარ დაედგომება თავის სამშობლოში სხვადასხვა მიზეზის გამო, ასეთ შემთხვევაში უწევთ ორი ინსტანცია, პირველი არის ადმინისტრაციული ორგანო საემიგრაციო სამსახური, სადაც ითხოვენ თავშესაფარს და იქ, ოფიცერი განიხილავს ამას და შესაძლებელია, აქვე დასრულდეს ეს პროცესი და ოფიცერმა დადებითი მიანიჭოს ამ პირს. უამრავი ასეთი ქეისი გვაქვს, რომ სასამართლომდე არც მიდის ეს პროცესი და ადმინისტრაციული ორგანო ანიჭებს თავშესაფარს პირს, რომელიც დაასაბუთებს, რომ მას კონკრეტული მიზეზით დევნიან საკუთარ ქვეყანაში.

ძირითადად არის პოლიტიკური ნიშნით. ასევე, ბოლო დროს ბევრია მედიის წარმომადგენელი, განსაკუთრებით, ოპოზიციური მედიის, რომლებიც ასაბუთებენ. რომ მიმდინარეობს აზრის გამო დევნა. ეს, მნიშვნელოვანი საფუძველია აშშ-ში თავშესაფრის მინიჭებისთვის. ჩვენთან, აზრის გამო დევნა ყოველდღიური სიტუაციაა და იქ არ არის ეს მიღებული სტანდარტი. განსხვავებული აზრის გამო მაინცდამაინც კი არ უნდა გხვრეტდნენ განსხვავებული აზრის გამო, არამედ რომ გავიწროებენ, ესეც პრობლემაა. თუ აზრის გამო სამსახურს კარგავ, ან ვერ შოულობ ახალ სამსახურს, მით უფრო თუ ვინმემ ფიზიკურად იძალადა, მაგალითად, დემონსტრაციაზე. ასეთი რაღაცები შტატებში ექვემდებარება დაცვას. ასევე, უმცირესობის წარმომადგენლები, ან ნებისმიერი ისეთი ნიშნით, რასაც ადამიანი ვერ შეცვლის და ამის გამო თუ იდევნები და ითხოვ თავშესაფარს, კანონი ითვალისწინებს დაცვას და ამ პირებისთვის სამწუხაროდ გრძელვადიანი, თუმცა ლეგალიზების პროცესი იწყება.

150 დღის ვადაში ეძლევათ პირებს სოციალური დაცვის ნომერი და სამუშაო უფლება, რის შემდეგაც ჩვეულებრივად ცხოვრობენ პროცესის განმავლობაში აშშ-ში. თუ უარს მიიღებენ ადმინისტრაციულ დონეზე, საქმე სასამართლოში მიდის და იქაც შეიძლება წლები გაგრძელდეს ეს პროცესი, მაგრამ ამ პერიოდშიც ლეგიტიმურად მუშაობს ადამიანი ამერიკაში”, – განაცხადა ეგუტიამ.

წამყვანის კითხვაზე, რამდენად გახშირებულია ბოლო 2 წელში თავშესაფრის მოთხოვნა პოლიტიკური ნიშნით, ეგუტია პასუხობს, რომ ძალიან გახშირებულია.

“ძალიან გახშირებულია, მათ შორის ყოფილი საჯარო მოხელეების მხრიდან, რომლებიც ამა თუ იმ მიზეზით იდევნებიან. მთავარი ამ მხრივ არის დევნა აზრის გამო, იმის გამო რომ რაღაც უკანონო დავალებას არ ასრულებენ. თავშესაფრის მომთხოვნთა შორის არიან ყოფილი ხელისუფლების წარმომადგენლები და მოქმედის უკვე გადამდგარი. არიან ასევე სამართალდამცავი ორგანოების წარმომადგენლები, სამწუხაროდ, შსს და თავდაცვა. ამ ბოლო დროს ჟურნალისტები და საჯარო მოხელეები, რომლებიც საფრთხეს გრძნობენ მას შემდეგ, რაც კრიტიკას გამოხატავენ ხელისუფლების მიმართ”, – განაცხადა ეგუტიამ “წერტილში”.

www.bm.ge