ვინ გახდება ოზურგეთის მუნიციპალიტეტის საკრებულოს თავმჯდომარე? – ეს კითხვა დღეს ოზურგეთში საკმაოდ აქტუალურია. იქამდე ვიდრე, ახლადდაკომპლექტებული საკანონმდებლო შეიკრიბება და თავმჯდომარის ვინაობა გაირკვევა, საზოგადოებაში სხვადასხვა ვერსია ვრცელდება.
ერთ-ერთი ვერსიის თანახმად, საკრებულოს თავმჯდომარის ახალ მოადგილედ ლავრენტი ბიგვავა განიხილება. ის წინა მოწვევის საკრებულოში სივრცით-ტერიტორიული დაგეგმარების და ინფრასტრუქტურის კომისიის თავმჯდომარე გახლდათ.
კითხვაზე, მიმდინარეობს თუ არა კონსულტაციები აღნიშნულ თანამდებობაზე მისი წარდგენის მიზნით, ლავრენტი ბიგვავა პასუხობს, რომ აღნიშნული ინფორმაცია სიმართლეს არ შეესაბამება.
– ამ თემაზე საუბარი არ ყოფილა და შესაბამისად, ვერ დაგიდასტურებთ. მსგავსი შემოთავაზება არავისგან მქონია. ისედაც თუ ამ პოსტზე წარდგენას შემომთავაზებენ, მე უარს ვიტყოდი. რადგან გარდა საკანონმდებლო საქმიანობისა, მინდა დრო ჩემი სამეცნიერო საქმიანობისთვისაც დამრჩეს, რაც თავმჯდომარის რანგში ალბათ შეუძლებელი იქნებოდა. თუმცა თუ რომელიმე სხვა თანამდებობას მანდობენ ახალ საკრებულოში, ვეცდები, ჩემი საქმიანობა მუნიციპალიტეტისთვის სასარგებლო და პროდუქტული იყოს.
მუდმივი კანდიდატურა, რომლის სახელი და გვარი ყოველი არჩევნების შემდეგ განიხილება საკრებულოს თავმჯდომარის რანგში და აღნიშნული ინფორმაცია ყოველთვის მართლდება, დავით დარჩიაა. ის ოზურგეთის მუნიციპალიტეტის ორი მოწვევის საკრებულოს თავმჯდომარე იყო და თუ ბიძინა ივანიშვილთან მის ახლო კონტაქტს გავითვლისწინებთ (დარჩია ივანიშვილის ჯგუფელი იყო), არსებობს მოლოდინები, რომ თავმჯდომარის პოზიციას ის არც მესამე მოწვევის საკრებულოში დათმობს.
– ჯერჯერობით არ ვიცი, ვერაფერს გეტყვით. რასაც არჩეული დეპუტატები გადაწყვეტენ, მე იმას მივიღებ და დავეთანხმები.
– გასაგებია, მაგრამ პირადად თქვენი დამოკიდებულება როგორია, გსურთ კვლავაც უხელმძღვანელოთ საკრებულოს თუ ამჯობინებთ დეპუტატის რანგში დარჩეთ?
– რა ვიცი..რა გითხრა…თუ მომეცემა საშუალება, რომ ჩემს მუნიციპალიტეტს კვლავაც ვემსახურო, მოხარული ვიქნები.
თავმჯდომარის ვინაობას მნიშვნელოვნად არ მიიჩნევენ ”ერთიან ნაციონალურ მოძრაობაში”, პარტიაში, რომელიც ახალ საკრებულოში წინა მოწვევასთან შედარებით გაცილებით ფართოდ არის წარმოდგენილი, მიიჩნევენ, რომ მთავარი ბრძოლა ახლა მესამე პრეზიდენტის გათავისუფლებას და ოლიგარქიის დამარცხებას უკავშირდება და შესაბამისად, ”ქართული ოცნების” ერთი წარმომადგენელი გახდება თავმჯდომარე თუ მეორე, არანაირი მნიშვნელობა არა აქვს. პარტიის ადგილობრივი ორგანიზაციის თავმჯდომარე და დეპუტატი დავით მჟავანაძე მიიჩნევს, რომ თუ მთელი საქართველოს მასშტაბით ოპოზიცია საკრებულოებს ბოიკოტს გამოუცხადებს, ეს გადაწყვეტილება ამ ვითარებაში ყველაზე მართებული იქნება.
ვინ გახდება ოზურგეთის ახლადდაკომპლექტებული საკრებულოს თავმჯდომარე, ეს საკანონმდებლო ორგანოს პირველივე სხდომაზე გაირკვევა. თუმცა ვინც არ უნდა იყოს ის, ფაქტია, რომ საკმაოდ რთული საკრებულოს თავმჯდომარეობა მოუწევს, რადგან 2021-2025 წლების საკრებულო წინა წლებთან შედარებით საკმაოდ გაძლიერებული ოპოზიციური ფლანგით იქნება წარმოდგენილი.
Loading ...