ოზურგეთის აგრარულ ბაზარში კონფლიქტი მას შემდეგ დაიწყო, რაც ცოცხალი ფრინველით მოვაჭრეებს დილით მათი ფართი დაკეტილი დახვდათ. როგორც ბაზრის ადმინისტრაციამ განმარტა, ამის მიზეზი სურსათის უვნებლობის სამსახურის რეკომენდაცია გახდა, რომელიც მან ბაზარს მისცა და რომლის თანახმადაც ცოცხალი ფრინველითა და ცხოველებით სავაჭრო ტერიტორიას დამოუკიდებელი შესასვლელი უნდა ჰქონდეს. როგორც სოსო სიხარულძე ამბობს, წინააღმდეგ შემთხვევაში ბაზარი 1000 ლარით დაჯარიმდება.
მოვაჭრეები, რომლებიც დილიდან ფართის გახსნას ითხოვდნენ, აცხადებდნენ, რომ ალტერნატიული შესასვლელი სჭირდებათ, მაგრამ ასეთი შესაძლებლობა ფართს ქუჩიდან, კერძო საკუთრების მხრიდან აქვს, სადაც მცხოვრებლები მათი მხრიდან შესასვლელის გახსნის წინააღმდეგები არიან.
ადგილზე მობილიზებული იყო პოლიცია, ბაზრის ადმინისტრაცია და სურსათის უვნებლობის სამსახური. ასევე აქვე იყო ნაციონალური მოძრაობის ოზურგეთის ორგანიზაციის თავმჯდომარე დავით მჟავანაძე და დეპუტატი გიორგი შილაკაძე , რომელებიც მოვაჭრეების პრობლემების ადვოკატირებას ცდილობდნენ.
საბოლოოდ შეთანხმების მიუღწევლობის გამო მოვაჭრეებმა ჭიშკარი ძალის გამოყენებით გატეხეს. იმის გამო რომ ფრინველი დიდი ხნის განმავლობაში საკვებისა და წყლის გარეშე იყო, მოვაჭრეებს რამდენიმე მათგანი მკვდარი დახვდათ, რამაც ადგილზე დაპირისპირება გამოიწვია.
საბოლოოდ ჯერჯერობით მოვაჭრეები იგივე ფართში იმყოფებიან და საბოლოო გადაწყვეტილება მოგვიანებით იქნება მიღებული.
Loading ...