ვიდეო – რამ გამოიწვია ფიზიკური დაპირისპირება ოზურგეთის სტადიონზე – პენალტისა და კონფლიქტის კადრები

ოზურგეთის ‘’მერცხალსა’’ და აბაშის ‘’ზანას’’ შორის მატჩი ფიზიკურ დაპირისპირებაში გადაიზარდა. შეხვედრას ოზურგეთის ‘’მერცხალი’’ იგებდა, როცა მის კარში პენალტი დაინიშნა. მეკარემ ბურთის მოგერიება შეძლო, თუმცა მსაჯმა ჩათვალა, რომ მეკარემ წესები დაარღვია და ნაბიჯი წინ გადმოდგა. შესაბამისად, პენალტი ხელმეორედ დანიშნა, რასაც ‘’მერცხალის’’ ფეხბურთელებისა და გულშემატკივრების პროტესტი მოყვა.

კონფლიქტი ფიზიკურ დაპირისპირებაში გადაიზარდა, თუმცა ვითარების განმუხტვა მოხერხდა და მატჩი გაგრძელდა, მაგრამ ‘’მერცხალის’’ ერთი ფეხბურთელი მსაჯმა მოედნიდან გააძევა.

დღევანდელი მატჩით, რომელიც ფრედ 1-1 დამთავრდა, რეგიონული ლიგის დასავლეთის გათამაშება დასრულდა. ლიგაში ‘’მერცხალმა’’ ადგილი შეინარჩუნა, რაც ნიშნავს, რომ გუნდი ფეხბურთის ფედერაციისგან დაფინანსებას მომავალ წელსაც მიიღებს.

როგორც ”მერცხალის” მწვრთნელმა აკაკი ათუაშვილმა განაცხადა, დღეს დაასრულა აღნიშნულ პოსტზე საქმიანობა და კვლავ ბავშვთა ფეხბურთში ბრუნდება. მისი თქმით, შემოთავაზების შემთხვევაშიც უარს იტყვის საქმიანობა ”მერცხალში” გააგრძელოს.

‘’ეს გუნდი არ არსებობდა, U-17 მონაწილეობდა იმერეთის რეგიონულ გათამაშებაში, ის გუნდი დავშალე და გადმოვიტანეთ და სირცხვილი მოვწმინდე ოზურგეთის ფეხბურთს.  დავამთავრეთ ჩემპიონატი 19 ქულით, შევუნარჩუნეთ გუნდს დაფინანსება და მომავალში გააგრძელებს, ჩემი აზრით, ღირსეულად რეგიონულ ლიგაში. სამომავლო გეგმები მომავალ ხელმძღვანელობას შევეკითხოთ, მე დღეს, 10 დეკემბერს დავამთავრე ჩემი პასუხისმგებლობა, ბავშვთა ფეხბურთში გადავალ ისევ, მე დავამთავრე ჩემი პასუხისმგებლობა, ეს ჩემი დამატებითი ვალდებულება იყო.’’- უთხრა აკაკი ათუაშვილმა ”გურიაTV”-ს.