ვიდეო – დაპირისპირება ლანჩხუთის საკრებულოში – რატომ დაამტკიცა ახალი ბიუჯეტი ძველმა საკრებულომ

დღეს ხმაური იყო ლანჩხუთის მუნიციპალიტეტის საკრებულოში. სიტყვიერი დაპირისპირება მას შემდეგ დაიწყო, რაც დეპუტატმა კახა ასკურავამ “ნაციონალური მოძრაობიდან” საკრებულოს მიერ მომავალი წლის ბიუჯეტის დამტკიცება გააპროტესტა.

როგორც კახა ასკურავამ განაცხადა, მუნიციპალიტეტის ახალი ფინანსური დოკუმენტი ახალ საკრებულოს უნდა დაემტკიცებინა და ძველი მოწვევის საკრებულოს შემადგენლობის მიერ მომავალი წლის ბიუჯეტის დამტკიცება “ქართული ოცნების” პოლიტიკური დაკვეთაა და მასში მონაწილეობას არ მიიღებს. დეპუტატმა პროტესტის ნიშნად სხდომა დატოვა.

როგორც ლანჩხუთის მუნიციპალიტეტის მერი ამბობს, საკრებულოს, მათ შორის ასკურავას ფრაქციის მხრიდან ბიუჯეტთან დაკავშირებით ერთი შენიშვნაც არ ყოფილა. ასეთ შემთხვევაში კი ბიუჯეტი უკან არ ბრუნდება და ის დასამტკიცებლად სხდომაზე გამოდის.

დღეს ლანჩხუთის მუნიციპალიტეტის საკრებულომ 2022 წლის ბიუჯეტი ხმათა უმრავლესობით დაამტკიცა. მომავალი წლის ფინანსური დოკუმენტი 14 434 000 ლარით განისაზღვრა.