ვეღარ ვხედავ პოლიტიკაში დარჩენის საჭიროებას – რა მიზეზებზე ისაუბრა ირაკლი ღარიბაშვილმა

„ის საპატიო მისია, რომელიც მე თავის დროზე, პოლიტიკაში დაბრუნებისას, ჯერ თავდაცვის მინისტრად, შემდეგ უკვე მეორედ პრემიერ-მინისტრად დანიშვნა და ბოლოს უკვე პარტიის თავმჯდომარედ არჩევით დამეკისრა, ჩვენი პარტიის დამფუძნებლის და გუნდის მხირდან, შეიძლება ითქვას, რომ უკვე შევასრულე.

ახლა ვეღარ ვხედავ პარტიის თავმჯდომარედ და ზოგადად, პოლიტიკაში დარჩენის საჭიროებას, სწორედ ამიტომ მივიღე გადაწყვეტილება დავტოვო „ქართული ოცნების“ თავმჯდომარის პოსტი და პოლიტიკიდან გავიდე. საკუთარი ქვეყნის სამსახური კი სხვა პოზიციიდან განვაგრძო“, – თქვა ღარიბაშვილმა.

როგორც ხშირად, ისე ამჯერადაც ირაკლი ღარიბაშვილმა მადლობა გადაუხადა ბიძინა ივანიშვილს, „ქართული ოცნების“ თავმჯდომარეს:

„რა თქმა უნდა, მე კვლავაც, 2012 წლის 1 ოქტომბრის გამარჯვების მთავარი მონაპოვრის, იდეალების, ღირებულებების და პრინციპების ერთგული ვარ, რომელსაც მთელი ჩემი პოლიტიკური საქმიანობა უკავშირდება. შესაბამისად, ვრჩები, როგორც ბატონი ბიძინა ივანიშვილის გუნდის, ისე ჩვენი ქვეყნის ერთგულ ჯარისკაცად.

მსურს, ჩემი გულწრფელი მადლიერება გამოვხატო ბატონი ბიძინა ივანიშვილის მიმართ, რომელმაც მომცა უნიკალური შესაძლებლობა, ქვეყნის უმაღლესი პოლიტიკური თანამდებობებიდან მემსახურა საქართველოსთვის“.

კითხვაზე, განიხილავს თუ არა პოლიტიკაში კვლავ დაბრუნებას, მან უპასუხა, რომ „გამორიცხული არაფერი არ არის“. მან „სისიულელე“ უწოდა ოპოზიციური პარტიის შექმნას.

ირაკლი ღარიბაშვილი „ქართული ოცნების“ ხელისუფლებაში მოსვლის შემდეგ ორჯერ იკავებდა პრემიერ-მინისტრის თანამდებობას, იყო შს მინისტრი, თავდაცვის მინისტრი. ბოლო პერიოდში კი პრემიერ-მინისტრის თანამდებობიდან გადადგომის შემდეგ იკავებდა პარტიის თავმჯდომარის თანამდებობას.