ოზურგეთის სამკუთხა პარკში არსებულ ახლადგარემონტებულ შენობაში, სადაც გასახდელი და საპირფარეშოა განთავსებული, უცნობმა პირებმა ფანჯრის შუშები გატეხეს და კედლებზე სხვადასხვა ტიპის წარწერა დატოვეს.
ვანდალიზმის ამ ფაქტს ოზურგეთის მუნიციპალიტეტის მერი ავტანდილ თალაკვაძე ყოველკვირეულ სხდომაზე გამოეხმაურა.
‘’ვანდალიზმის ის ფაქტები, რომელიც ოზურგეთში მოხდა, ძალიან სამწუხაროა. ჩვენი ქალაქი ლამაზდება და ამ დროს უცნობი პირები ამ ყველაფერს აზიანებენ. სწორედ ამის გამოა განთავსებული სხვადასხვა ლოკაციაზე ვიდეო-კამერები, რასაც ოპოზიციის მხრიდან პოპულისტური განცხადებები მოჰყვა. ვანდალიზმის არცერთი ფაქტი არ დარჩება რეაგირების გარეშე. საზოგადოებას მოვუწოდებ, გაუფრთხილდეს ჩვენს ქალაქს და არ დააზიანოს ის ინფრასტრუქტურა, რომელიც ჩვენს ქალაქს ალამაზებს და ძალიან სჭირდება’’ – აღნიშნავს ავთანდილ თალაკვაძე.
ამ დროისათვის სკვერში არსებულ შენობაში ინფრასტრუქტურა მუნიციპალიტეტის მერიამ უკვე აღადგინა.
ვანდალიზმის შემთხვევები უცხო არც სხვა ქალაქებისთვის არის. 2020 წელს ვანდალიზმის მთელი რიგი შემთხვევები 168 მისამართზე აღირიცხა, – ამის შესახებ თბილისის მერმა, კახა კალაძემ დედაქალაქის მთავრობის სხდომაზე განაცხადა.
ვანდალიზმი ეს არის საზოგადოებრივად საშიში, მართლსაწინააღმდეგო ქმედება, რომელიც გამოიხატება შენობებისა და ნაგებობების დამახინჯებასა და წაბილწვაში, საზოგადოებრივ ტრანსპორტსა თუ საზოგადოებრივ ადგილებში ქონების დაზიანებში. სახელწოდება წარმოდგება ძველი გერმანული ტომის ვანდალებისაგან, რომლებმაც 455 წელს რომი დაარბიეს და მრავალი ანტიკური ძეგლი გაანადგურეს.
ავტორი: ლიკა სარიშვილი
მასალა მომზადებულია პროექტის “განათლებული, პროფესიონალი კადრები რეგიონული მედიის გაძლიერებისთვის” ფარგლებში.
Loading ...
