ექსპერტიზის ცნობით, გოშაძის და მიმინოშვილის წინააღმდეგ პროკურატურის ვიდეოები დამონტაჟებულია

სამხარაულის ექსპერტიზის ბიუროს დასკვნით, ვიდეომასალა, რომელიც აქციების დროს დაკავებული თორნიკე გოშაძის და ირაკლი მიმინოშვილის წინააღმდეგ საქმეში დევს, დამოტაჟებულია და რამდენიმე გრძელი კადრის გადაბმას წარმოადგენს.

“ადვოკატი ნინო ლომინაძე მოითხოვს საქმეს დაერთოს სამხარაულის ექსპერტიზის ბიუროდან მიღებული დასკვნები, ხოლო ამ ექსპერტიზის ჩამტარებლები დაიკითხონ.

ნინო ლომინაძემ ექსპერტიზა დანიშნა იმ ვიდეოებზე, რომლებიც თორნიკე გოშაძისა და ირაკლი მიმინოშვილის წინააღმდეგ საქმეში დევს.

ექსპერტიზამ აჩვენა, რომ ვიდეოები დამონტაჟებულია და რამდენიმე გრძელი კადრის გადაბმას წარმოადგენს.

პროკურატურამ უდაოდ გახადა ამ ექსპერტიზის შედეგის შინაარსი, ეს ნიშნავს, რომ დაეთანხმა ექსპერტიზის დასკვნის შინაარს.

ადვოკატი, წინააღმდეგი არაა, რომ მისი ჩატარებული ექსპერტიზა საქმეში მოხვდეს, როგორც “უდაო”. – ნათქვამია რადიო თავისუფლების ლაივ ბლოგში.

თბილისის საქალაქო სასამართლოში აქციების დროს დაკავებული 8 პირის, ზვიად ცეცხლაძის, ვეფხია კასრაძის, ვასილ კაძელაშვილის, ირაკლი მიმინოშვილის, ინსაფ ალიევის, თორნიკე გოშაძის, ნიკოლოზ ჯავახიშვილისა და გიორგი გორგაძის სხდომა მიმდინარეობს.

პროკურატურა სამ ბრალდებულს, ზვიად ცეცხლაძეს, ვეფხია კასრაძესა და ვასილ კაძელაშვილს ჯგუფური ძალადობის ორგანიზებასა და ხელმძღვანელობას ედავება – მათ 6-დან 9 წლამდე თავისუფლების აღკვეთა ემუქრებათ.

ხუთს კი – ირაკლი მიმინოშვილს, ინსაფ ალიევს, თორნიკე გოშაძეს, ნიკოლოზ ჯავახიშვილსა და გიორგი გორგაძეს ჯგუფურ ძალადობაში მონაწილეობას ედავებიან, რაც 4-დან 6 წლამდე თავისუფლების აღკვეთას ითვალისწინებს.