რუსეთის მიერ ოკუპირებული ცხინვალის რეგიონის დე ფაქტო სასამართლო დღეს, 13 დეკემბერს განიხილავს ე.წ. საზღვრის განზრახ დარღვევაში ბრალდებული ექიმის, ვაჟა გაფრინდაშვილის საქმეს.
ქართველი ექიმი თვეზე მეტია უკანონო პატიმრობაში იმყოფება. დე ფაქტო სასამართლოში საქმის განხილვა დღის მეორე ნახევარში დაიწყება.
ვაჟა გაფრინდაშვილის გათავისუფლება იყო მთავარი საკითხი, რომელიც 10-11 დეკემბერს, ჟენევის საერთაშორისო დისკუსიების 50-ე რაუნდზე განიხილეს. საქართველოს სამთავრობო დელეგაციამ რუსეთისა და მისი სოაკუპაციო რეჟიმისგან კიდევ ერთხელ მოითხოვა ექიმის დაუყოვნებლივ გათავისუფლება. ეს მოთხოვნა ჰქონდათ ევროკავშირის, გაეროს, ეუთოსა და აშშ-ის წარმომადგენლებსაც.
რუსეთის საოკუპაციო ძალებმა ცნობილი ექიმი-ტრავმატოლოგი ვაჟა გაფრინდაშვილი 9 ნოემბერს, ახალგორის რაიონში დააკავეს. მას დე ფაქტო ხელისუფლებამ ე.წ. საზღვრის განზრახ დარღვევის ბრალდება წაუყენა და ორთვიანი წინასწარი პატიმრობა შეუფარდა. ექიმის ოჯახი ვარაუდობს, რომ ვაჟა გაფრინდაშვილს ახალგორის რაიონში დაშავებული ადამიანისთვის დახმარების გაწევა სურდა.
Loading ...
