‘’ეტლით მოსარგებლე გზაზე დამდგარ წყალში ჩავარდა და კარგა ხნის გასვლის შემდეგ ამოვიყვანეთ, ლამის დაიხრჩო.’’ – რას ითხოვენ ოზურგეთის სოციალური საცხოვრისის მობინადრეები

ოზურგეთში, ჟღენტის ქუჩაზე სოციალური საცხოვრისის მობინადრეები  დახმარებას ითხოვენ.

ოზურგეთში, ჟღენტის ქუჩაზე,  კორპუსში მცხოვრებნი უკვე 7 წელია გზის დაგებასა და კანალიზაციის მილების გაკეთებას უშედეგოდ ითხოვენ.

წვიმის დროს მოსახლეობას გადაადგილება უჭირს, რადგან გზაზე წყლის გუბეები დგება. მოუწესრიგებელი გზა ასევე საფრთხეს უქმნის ბავშვებსა და შშმ პირებს.

– ” 7 წელია ვითხოვთ გზის გაკეთებას. წვიმის შემდეგ  შენობის მიმდებარე ტერიტორიაზე ტბები დგება. აქ შშმ პირები ცხოვრობენ,რომელთაც დამოუკიდებლად გადაადგილება უჭირთ. ერთი ბავშვი,რომელიც ეტლით მოსარგებლეა გზაზე დამდგარ წყალში ჩავარდა და კარგა ხნის გასვლის შემდეგ ამოვიყვანეთ,ლამის დაიხრჩო.წვიმის შემდეგ ბავშვებს ვერ ვუშვებთ გარეთ სათამაშოდ,გვეშინია წყალში არ ჩაგვივარდნენ. “ – განაცხადა ერთერთმა მობინადრემ “გურიაTV” – თან საუბრისას.

კორპუსის მაცხოვრებლებისათვის ასევე გადაუჭრელ პრობლემად რჩება მოუწესრიგებელი კანალიზაცია. ნესტიანი კედლები და კანალიზაციის  აუტანელი სუნი მათთვის საცხოვრებელ პირობებს  გაუსაძლის ხდის.

ადგილობრივი მცხოვრები –” სარდაფი კანალიზაციის წყლით არის სავსე, რის გამოც საშინელი სუნი დგას. პირველ სართულზე  იატაკიდან წყალიც ამოდის საცხოვრებელ ოთახებში. ფაქტობრივად პირველი სართული წყალშია. მესამე სართულზე შედარებით კარგი მდგომარეობაა,მაგრამ მეორესა და პირველზე კედლები ზოგან სველია და ნესტისგან მათზე სოკოებია ამოსული,როგორც დერეფანში, ისე თითქმის ყველა საცხოვრებელ ოთახში.ასეთ პირობებში რემონტის გაკეთებას აზრიც არ აქვს და ვცხოვრობთ ასე.”   

კორპუსის მაცხოვრებლებმა, როგორც თავად აცხადებენ მუნიციპალიტეტის მერიას წერილობით არაერთხელ მიმართეს, როგორც აცხადებენ სოციალურ საცხოვრისს ხშირად სტუმრობენ მერიის წარმომადგენლები, თუმცა ამ კონკრეტულ პრობლემებზე  მათი მხრიდან ქმედითი ნაბიჯები არ გადადგმულა, ისინი ჯერჯერობით მხოლოდ დაპირებით შემოიფარგლებიან.

‘’გურიაTV’’ აღნიშნულ თემაზე ადგილობრივ ხელისუფლებას მიმართავს და მათ კომენტარს მიღებისთანავე შემოგთავაზებთ.

ქალაქ ოზურგეთის მუნიციპალიტეტის მერიამ აღნიშნული სოციალური საცხოვრისი 2014 წელს გახსნა და მასში 60 უსახლკარო ოჯახი შეასახლა. მერიამ მათ ბინები უვადო სარგებლობაში გადასცა და მისი საკუთრებად დაკანონებისგან თავი შეიკავა. სოციალური საცხოვრისის მობინადრეები სხვადასხვა ინფრასტრუქტურული პრობლემის მოგვარების თხოვნით ადგილობრივ ხელისუფლებას ხშირად მიმართავენ, თუმცა მათი საჭიროებების დიდი ნაწილი ამ დრომდე დაუკმაყოფილებელია.

ავტორები: ლიკა თურქაძე და ანი დოლიძე

მასალა მომზადებულია პროექტის “განათლებული, პროფესიონალი კადრები რეგიონული მედიის გაძლიერებისთვის” ფარგლებში.