ოზურგეთის მუნიციპალიტეტის სოფელ ორმეთში საპროტესტო აქცია გაიმართა. მოსახლეობა სოფელში ინფრასტრუქტურის არარსებობას აპროტესტებს და ადგილობრივ ხელისუფლებას ყურადღების მიქცევას სთხოვს. ორმეთში სრულიად ამორტიზებულია გზა, არ არის წყალი, გასარემონტებელია ხიდი. არ არის ნაგვის ურნები და გარეგანათება. ამჟამად სოფელში 29 ივნისის უხვი ნალექის შედეგად დაზიანებული მონაკვეთების აღდგენა-რეაბილიტაცია მიმდინარეობს.
მუნიციპალური ტექნიკა მობილიზებულია ორმეთის საგზაო მონაკვეთზე, სადაც 5 კილომეტრამდე სიგრძის გზა დაგრეიდერდა.
მიმდინარეობს დაზიანებული მილხიდების რეაბილიტაციაც.
თუმცა ორმეთელების პრობლემები უამრავ წელს ითვლის და მათი მოგვარება დღემდე ვერცერთმა ხელისუფლებამ ვერ მოახერხა.” ჩვენ XXI საუკუნეში არ ვცხოვრობთ, სასწაულ მდგომარეობაში ვართ, გზა საერთოდ არ ვარგა, მსუბუქი ავტომობილები ამ გზით ვერ სარგებლობენ. ვერ მოდის სახანძრო და სასწრაფო სამედიცინო დახმარების ჯგუფები. სიცოცხლისთვის საშიშია ხიდი, რომლის გაკეთებაც საშველი არ დაადგა. ოზურგეთის მერი სამი წლის წინ დაგვპირდა, რომ სიტუაცია ორმეთში გამოსწორდებოდა, მაგრამ დაპირება დაპირებად დარჩა. “-აცხადებენ ორმეთელები.