ესპანეთში აღმოაჩინეს სანქცირებული რუსი ოლიგარქების იახტა, სახლები და სხვა ქონება

ესპანეთის ხელისუფლებამ აღმოაჩინა ევროკავშირის მიერ სანქცირებული 15 რუსი ოლიგარქის ქონება, მათ შორის, სახლები, კომპანიები და მინიმუმ ერთი იახტა. სააგენტო Reuters-ს ესპანეთის ნოტარიუსთა გენერალური საბჭოს ფულის გათეთრების აღკვეთის განყოფილების ხელმძღვანელმა, მარიანო გარსია ფრესნომ უთხრა, რომ აქტივები აღმოჩენილია უკრაინაში რუსეთის შეჭრის, 24 თებერვლის შემდეგ, როცა ოლიგარქები ცდილობდნენ ზოგიერთ კომპანიაში საკუთარი წილების გადაცემას ნათესავებისა და პარტნიორებისთვის.

ფრესნოს ინფორმაციით, ევროკავშირის სანქციების სიაში მყოფი 15 პირის გარდა, აღმოჩენილია მათთან, ან მათი ოჯახის წევრებთან კავშირის მქონე 105 პირი. კონკრეტულ გვარებს ესპანელი იურისტი არ ასახელებს და მხოლოდ იმას ამბობს, რომ მათ შორის არიან როგორც ძალიან, ასევე, ნაკლებად ცნობილი პირები.

უკრაინაში რუსეთის შეჭრის შემდეგ, ევროკავშირმა სანქციები დაუწესა ათეულობით რუს პოლიტიკოსს, სამხედრო მაღალჩინოსანს და ბიზნესმენს. ამასთან, აღსრულების პროცესი სირთულეებს აწყდება უძრავი ქონების, საბანკო ანგარიშების და იახტების რეალური მფლობელების იდენტიფიცირებისას, რადგან სანქცირებული პირების ბევრი ქონება სხვის სახელზეა გაფორმებული. ამ კვირაში, ევროკომისიამ განაცხადა, რომ წარადგენს საკანონმდბელო წინადადებას სამართლებრივი დევნისთვის მათ წინააღმდეგ, ვინც სანქციებისთვის თავის არიდებას ცდილობს, მაგალითად, საკუთარი ქონების ოჯახის წევრებისთვის გადაცემით.

ესპანეთის ნოტარიუსთა გენერალური საბჭოს ფულის გათეთრების აღკვეთის განყოფილების ხელმძღვანელის, მარიანო გარსია ფრესნოს ინფორმაციით, ესპანეთში 2004 წლიდან დარეგისტრირებული ტრანზაქციებიდან 1000-ზე მეტი პირის შემოწმებით დაადგინეს, რომ სანქცირებულ ოლიგარქებს წილი ჰქონდათ სულ მცირე 10 ესპანურ და 13 უცხოურ კომპანიაში.

შესაბამისი ინფორმაცია გადაეცა ესპანეთის ფინანსთა სამინისტროს და ფინანსური დაზვერვის სამსახურს. აპრილის ბოლოს, ესპანეთის მთავრობაში დაადასტურეს, რომ გაყინულია სანქცირებულთა სიაში მყოფ 5 პირთან დაკავშირებული 12 საბანკო ანგარიში და დაყადაღებულია 3 იახტა და უძრავი ქონების 23 ობიექტი. ფრესნოს თანახმად, რუს ოლიგარქებთან კავშირის მქონე კომპანიები ესპანეთში ფლობენ უძრავი ქონების 35-მდე ობიექტს და საბანკო ანგარიშებსა და წილებს ესპანეთის და ევროპის სხვა ქვეყნების კომპანიებში.

www.radiotavisupleba.ge