საქართველოს ეროვნული ბანკის 2 ვიცე-პრეზიდენტი პაპუნა ლეჟავა და კიდევ ერთი ვიცე-პრეზიდენტი, არჩილ მესტვირიშვილი, თანამდებობას ტოვებს. ამის შესახებ ცნობილი გახდა დღეს, 20 სექტემბერს, ეროვნულ ბანკში გამართულ ბრიფინგზე – უცნობია, უკავშირდება თუ არა ეს გადაწყვეტილება ბანკში გუშინ, 19 სექტემბერს, მიღებულ ცვლილებებს.
“ვერ ვიქნები იმ გადაწყვეტილების მონაწილე, რომელზეც არც გავლენა მაქვს და არც ვეთანხმები”, – უთხრა BM.ge-ის არჩილ მესტვირიშვილმა.
19 სექტემბერს საქართველოს ეროვნულმა ბანკმა, რომლის პრეზიდენტის მოვალეობას ყოფილი ეკონომიკის მინისტრი ნათია თურნავა ასრულებს, გამონაკლისი დაუშვა სანქცირებული საქართველოს მოქალაქეებისთვის. ამ გადაწყვეტილებით, აშშ-ის მიერ სანქცირებულ ოთარ ფარცხალაძეს საბანკო ანგარიშებზე წვდომის შესაძლებლობა უნდა მისცემოდა.
“პაპუნა ლეჟავამ მაცნობა ელექტრონული კომუნიკაციის საშუალებით, დაწერა განცხადება გადადგომაზე. ძალიან სამწუხაროა, კარგი პროფესიონალია. მუშაობდა ამდენი წელი ეროვნულ ბანკში.
მინდა იმის თქმა, რომ შესაძლოა სხვადასხვა კოლეგას, ყოფილ კოლეგას ჰქონდეს თავისი შეხედულება ამა თუ იმ გადაწყვეტილებასთან დაკავშირებით. მაგრამ ჩემთვის ეჭვგარეშეა, როცა ეხება ეროვნული ბანკის მიერ კონსტიტუციის აღსრულებას და მასთან შესაბამისობას და საქართველოს მოქალაქეების ფუნდამენტური უფლებების დაცვას, აქ ორი აზრი არ უნდა არსებობდეს – აქ ჩემი პოზიცია არის აბსოლუტურად ნათელი და შეუქცევადი“, – თქვა ნათია თურნავამ.
მას ჟურნალისტმა დაუსვა დამაზუსტებელი კითხვა, უკავშირდება თუ არა პაპუნა ლეჟავას გადადგომა ეროვნულ ბანკში მიღებულ გადაწყვეტილებას. “ის არ დაეთანხმა თქვენს პოზიციას?” – იკითხა ჟურნალისტმა.
“ეს მას უნდა ჰკითხოთ”, – უპასუხა ნათია თურნავამ.
პაპუნა ლეჟავამ გადადგომის შესახებ დაწერილი განცხადების ფოტო გამოაქვეყნა სოციალურ ქსელ ფეისბუკშიც. განცხადების მიხედვით, იგი თანამდებობას დატოვებს 21 ნოემბრიდან.
Loading ...