საქართველოს მთავრობა დღეს სახელმწიფო უნივერსიტეტებში სტუდენტების მიღების კვოტებს დაამტკიცებს. როგორც “ოცნების” პრემიერ-მინისტრმა ირაკლი კობახიძემ განაცხადა, კვოტები პირველად დამოუკიდებლობის აღდგენის შემდეგ შრომის ბაზრის სიღრმისეულ ანალიზს დაეფუძნება, რომელიც ეკონომიკის სამინისტრომ განათლების სამინისტროსთან ერთად განახორციელა.
მისი თქმით, კვოტები განისაზღვრება უმაღლესი განათლების რეფორმის კონცეფციის შესაბამისად, „ერთი ქალაქი, ერთი ფაკულტეტის“ პრინციპის ფარგლებში.
“დღეს საქართველოს მთავრობა დაამტკიცებს სახელმწიფო უნივერსიტეტებში სტუდენტების მიღების კვოტებს. ეს კვოტები, პირველად დამოუკიდებლობის აღდგენის შემდეგ დაეფუძნება შრომის ბაზრის სიღრმისეულ ანალიზს, რომელიც განხორციელდა ეკონომიკის სამინისტროს მიერ განათლების სამინისტროსთან ერთად, რაც არის ძალიან მნიშვნელოვანი სიახლე.
გარდა ამისა, ეს კვოტები განისაზღვრება უმაღლესი განათლების რეფორმის კონცეფციის შესაბამისად, “ერთი ქალაქი, ერთი ფაკულტეტის” ფარგლებში”, – განაცხადა კობახიძემ.
მისი თქმით, დღეს საკითხთან დაკავშირებით “ოცნების” მთავრობაში განათლების მინისტრი გივი მიქანაძე ბრიფინგს გამართავს და დეტალებზე ის ისაუბრებს.
კობახიძემ თქვა ისიც, რომ რეფორმის ფარგლებში თსუ-ს “დედა უნივერსიტეტის” სტატუსი დაუბრუნდება.
უნდა აღინიშნოს, რომ “ოცნების” მთავრობაში განათლების მინისტრის მოადგილე ზვიად გაბისონიამ გასული წლის დეკემბერში თქვა, რომ “შრომის ბაზრის კვლევა მომავალ კვირაში გამოქვეყნდება”, თუმცა კვლევა ამ დრომდე არ არის საჯარო. bm.ge-მ კვლევის მისაღებად შესაბამის უწყებებს არაერთხელ მიმართა.
Loading ...