ფქვილის იმპორტის საფასური გაიზარდა, ქერის და ქატოს იმპორტზე კი, საფასური დაწესდა.
როგორ აისახა სარკისებრი საფასური ადგილობრივ ბაზარზე და მოსალოდნელია თუ არა, საქართველოში პურისა და პურ-პროდუქტების გაძვირება, რადიო „პალიტრასა“ და „პალიტრანიუსის“ გადაცემაში „საქმე“, „ბარაქას“ გენერალურმა დირექტორმა ისაუბრა.
„მიმდინარე პერიოდში წისქვილკომბინატებს რა ნაშთები და მარაგებიც გვაქვს, იმის მიხედვით შემიძლია დანამდვილებით გითხრათ, რომ დაახლოებით წლის ბოლომდე ფასის მატებას არ ველოდებით, რა ზღვრული ნორმაც გვქონდა დაწესებული, იმ ზღვრულ ნორმას არ გასცდება. თუმცა, გამომდინარე აქედან, რომ მსოფლიო ბაზარზე არეული სიტუაციაა და ფასები მერყეობს, ამასთან მსოფლიოში 2 მიმდინარე ომია, გრძელვადიან პროგნოზს ვერ ვაკეთებთ. ზოგადად, არავინ იცის და ამ თემაზე გრძელვადიანი ანალიზი ალოგიკურიც კია.
ჩვენ 80-90%-ით იმპორტზე ვართ დამოკიდებული და მსოფლიო ბაზრის ტენდენციებით დგინდება ჩვენთან ფქვილის ფასი. ჩვენ, შეგვიძლია მხოლოდ იმის თქმა, რომ 2 თვის განმავლობაში ფასები არ გაიზრდება ფქვილზე და შესაბამისად, პურ-პროდუქტებზე”, – განაცხადა ბიძინაშვილმა.
მისივე თქმით, საიმპორტო საფასურის დაწესების შემდეგ, საქართველოში გადამუშავებული ფქვილის ფასი 1 ტომარაზე 4 ლარით გაიზარდა.
„საიმპორტო საფასურის დაწესების შემდეგ, 1 ტომარა წისქვილიდან გამოსული პირველი ხარისხის ფქვილი 50 ლარი ღირს. დადგენილების მიღებამდე კი, 46 ლარი ღირდა. 4 ლარით გაძვირდა ტომარა, რაც კილოგრამზე დაახლოებით 8-თეთრიანი გაძვირება გამოდის”, – თქვა ბიძინაშვილმა „საქმეში”.
ინფორმაციისთვის, მთავრობამ ფქვილზე საიმპორტო საფასური 50 ლარით გაზარდა, ქატოსა და ქერზე კი, ახალი საფასური დააწესა,100 ლარის ოდენობით. გადაწყვეტილება 2 ოქტომბერს, მთავრობის სხდომის დასრულების შემდეგ გახდა ცნობილი და ძალაში 10 ოქტომბრიდან შევიდა.
www.bpn.ge
Loading ...