ერთადერთი მოსწავლის საშემოდგომო ზეიმი ზემო სურების საჯარო სკოლაში – გაბრიელი სკოლის ერთადერთი მეორეკლასელია

7 წლის გაბრიელი ზემოსურების საჯარო სკოლის მეორეკლასელია. მის კლასში ერთადერთი მოსწავლეა. კლასელები არ ჰყავს, მაგრამ მიუხედავად ამისა, ცდილობს მისი სასკოლო ცხოვრება საინტერესო და განხორციელებული იდეებით დატვირთული იყოს.

საშემოდგომო ზეიმიც პედაგოგთან ერთად თვითონ დაგეგმა. დეკორაციებიც მოამზადა, მასწავლებელთან ერთად სცენარიც შეიმუშავა, დახატა, დაწერა, გააფერადა და საკმაოდ საინტერესო ღონისძიების ავტორიც და მონაწილეც თავად გახდა.

გაბრიელ ლომთათიძის პედაგოგი მანანა ბარამიძეა. როგორც ქალბატონი მანანა ამბობს, გაბრიელი მისი ერთ-ერთი უსაყვარლესი მოსწავლეა და მის წინსვლას მთელი გულით გულშემატკივრობს.

– შემოდგომის სეზონის აღქმა და განცდა მე და ჩემს ერთ უსაყვარლეს მოსწავლეს ასეთი აქტივობებით გვინდოდა და მგონი გამოგვივიდა. ვცდილობთ არ გვქონდეს ერთფეროვანი და მოსაწყენი გაკვეთილები. ერთად გვგეგმავთ აქტივობებს და ერთად ვახორციელებთ. მე თუ მკითხავთ, სულაც არ იქნება მოსწავლისთვის გაკვეთილი მოსაწყენი, როცა თვითონვეა აქტიური მონაწილე და იდებიც მასთან არის შეთანხმებული. შემოდგომის ბარაქის თანამონაწილეა სახლშიც,  მაგრამ აი საკლასო ოთახში ეს ყველაფერი სულ სხვა ეფექტის მქონე გამოდგა. ძალიან აქტიურად ჩაება ”შემოდგომის ნობათის” ღონისძიების ორგანიზებაში. ყველაფერი მოამზადა. უნდოდა, რომ ყველაფერი ლამაზი და შემოდგომის ფერის ყოფილიყო.მგონი გამოგვივიდა კიდეც. – აღნიშნა ქალბატონმა მანანამ.

მასალა მომზადებულია პროექტის “ჩვენ ვირჩევთ, ჩვენ ვაკონტროლებთ” ფარგლებში.

Funded through the Alumni Grants Program, U.S. Embassy in Georgia/დაფინანსებულია საქართველოში აშშ–ის საელჩოს ალუმნი საგრანტო პროგრამის ფარგლებში.