ეკატერინე ტიკარაძე გურიის მედიკოსებს შეხვდა – რა ითქვა შეხვედრაზე

ჯანდაცვის მინისტრი ეკატერინე ტიკარაძე,მოადგილესთან თამარ გაბუნიასთან და იმუნოლოგ-ალერგოლოგ ბიძინა კულუმბეგოვთან ერთად გურიის მედიკოსებს შეხვდა. შეხვედრაზე საუბარი რეგიონში მიმდინარე ვაქცინაციის პროცესს, მის მნიშვნელობას პანდემიის მართვის საკითხში და სხვა მნიშვნელოვან საკითხებს შეეხო. შეხვედრაზე კიდევ ერთხელ ითქვა, რომ აუცილებელია საზოგადოებაში ვაქცინაციის მიმართ ნდობის ამაღლება, რათა ჯანდაცვის სისტემამ პანდემიის მართვა შეძლოს.

მედიკოსების განცხადებით, გურიაში, ისევე, როგორც ბევრ რეგიონში  ვაქცინაციის მიმართულებით საკმაოდ დიდი პასიურობაა. პასიურობა იგრძნობა მედიკოსების მხრიდანაც. ოზურგეთის კლინიკა ”მედალფას” ხელმძღვანელის დავით მდინარაძის თქმით, კლინიკაში 260 თანამშრომელია, აქედან კოვიდ 19 გადატანილი აქვს 120-ს , ხოლო დანარჩენ 140 თანამშრომლიდან ვაქცინა მხოლოდ ოცმა მათგანმა გაიკეთა.

ჯანდაცვის მინისტრის განცხადებით, მალე ქვეყანაში სხვადასხვა ტიპის ვაქცინა შემოვა და მოსახლეობას ვაქცინებს შორის არჩევანის საშუალება ექნება.

შეხვედრას ესწრებოდა ბიძინა კულუმბეგოვიც. ცნობილმა ალერგოლოგ-იმუნოლოგმა მედიკოსების კითხვებს ამომწურავად უპასუხა. შეკითხვაზე, რომელიც ”ასტრაზენეკას” ვაქცინას ეხებოდა, კულუმბეგოვმა განაცხადა, რომ აღნიშნულ ვაქცინას სრული პასუხისმგებლობით უწევს გარანტიას 55 წელს ზემოთ, რადგან შესაძლო გართულებების რისკი ამ ასაკობრივ ზღვარს ზევით მყოფ მოქალქეებში მინიმალურია.კულუმბეგოვის განცხადებით, ზოგადად ყველა ვაქცინა ხარისხიანია და მისი მოხმარება პანდემიის წინააღმდეგ სასიცოცხლოდ მნიშვნელოვანი.

– სწორედ ასეთი, პირბადის ტარების 40% იანი მაჩვენებელი გვქონდა აგვისტოს თვეში და რა შედეგი მივიღეთ, კი დავინახეთ. ორი წესი, რომელიც პანდემიას უშველის არის პირბადის ტარება და ვაქცინაცია – აღნიშნა ბიძინა კულუმბეგოვმა.