ევროპის ადამიანის უფლებათა სასამართლომ საქმეზე – „საყვარელიძე საქართველოს წინააღმდეგ“ დაადგინა ევროკონვენციის მეორე მუხლის – „სიცოცხლის უფლების“ პროცედურული ასპექტის დარღვევა და მოპასუხე სახელმწიფოს – საქართველოს მოსარჩელისთვის არამატერიალური ზიანის ასანაზღაურებლად დააკისრა 25 ათასი ევროს გადახდა.
მოქალაქე მარიამ საყვარელიძემ ევროსასამართლოს მიმართა 2010 წელს, შემთხვევის გამო, რომელიც 2003 წლის ნოემბერში თბილისში, „ვარდების რევოლუციის“ სახელით ცნობილი მოვლენების დროს, საპროტესტო აქციების მიმდინარეობის ფონზე მოხდა. ავტომანქანას, რომელშიც პირადად მომჩივანიც იმყოფებოდა, დაეჯახა ჯავშანმანქანა. შედეგად, გარდაიცვალნენ მარიამ საყვარელიძის ვაჟი და და. დაზიანებები მიიღეს თავად მარიამ საყვარელიძემ და მისმა ახლო ნათესავმა მამაკაცმა.
ჯავშანმანქანას სავარაუდოდ მართავდა სამართალდამცავი ან სამხედრო პირი.
თავდაცვისა და შინაგან საქმეთა სამინისტროები, აგრეთვე თბილისის პროკურატურა წლების განმავლობაში იძიებდნენ საქმეს. ის რამდენჯერმე დაიხურა და განახლდა.
2010 წელს პროკურატურამ მარიამ საყვარელიძეს აცნობა, რომ საგამოძიებო ქმედებებით შეუძლებელი იყო იმის დანამდვილებით დადგენა, რა მოხდა 2003 წლის ნოემბერში. პროკურატურამ საქმე საბოლოოდ შეწყვიტა 2017 წლის მარტში ხანდაზმულობის ვადის გასვლის გამო.
მოქალაქე მარიამ საყვარელიძემ არაერთხელ სცადა გაერკვია სხვადასხვა გამოძიების მიმდინარეობის დეტალები, გაასაჩივრა საქმის დახურვის გადაწყვეტილება და ჩიოდა გამოძიების არაეფექტიანობის გამო.
მარიამ საყვარელიძემ ევროსასამართლოს მიმართა ევროკონვენციის მეორე მუხლის – „სიცოცხლის უფლების“ ხელყოფის გამო. ის თვლის, რომ საქართველოს სახელმწიფო პასუხისმგებელია მისი ვაჟისა და დის სიკვდილზე და რომ გამოძიება იყო არაეფექტიანი.
www.radiotavisupleba.ge
Loading ...
