"ევრონიუსი" – ციფრული კოვიდსერტიფიკატების შემოღების შესახებ ევროკავშირის წევრ ყველა ქვეყანაში შეთანხმება მიღწეულია

ევროკავშირის მასშტაბით ზაფხულის სეზონისთვის კორონავირუსთან დაკავშირებული ე.წ. სამოგზაურო „მწვანე სერტიფიკატის“ შემოღების შესახებ შეთანხმება მიღწეულია – ინფორმაციას „ევრონიუსი“ ავრცელებს.

მისივე ცნობით, „მწვანე სერტიფიკატი“ მიმართულია ტურისტული და სამსახურებრივი მიზნებით თავისუფალი გადაადგილებისკენ და მასში პირისთვის ჩატარებული აცრების, ტესტებისა და კოვიდისგან განკურნების შესახებ ინფორმაცია შევა.

ევროკავშირის მოქალაქეებს შეეძლებათ საშვის მიღება, თუ მათ აქვთ, სამი პუნქტიდან ერთ-ერთი მაინც.

„ევრონიუსის“ ცნობითვე, ევროპარლამენტმა დაადასტურა, რომ სამოგზაურო ბარათთან დაკავშირებით ევროკავშირის 27-ვე ქვეყანაში შეთანხმება მიღწეულია. ვაქცინირებულად ჩაითვლება პირი, რომელმაც მედიკამენტების ევროპული სააგენტოს (EMA) მიერ ავტორიზებული რომელიმე ვაქცინით ჩაიტარა ვაქცინაცია.

ბარათის მოთხოვნა შეეძლებათ იმ პირებსაც, რომლებმაც ჯერ მხოლოდ პირველი დოზა მიიღეს. ამ დროისთვის EMA-ს ავტორიზებული აქვს „ფაიზერის“, „მოდერნას“, „ასტრაზენეკას“ და „ჯონსონის“ ვაქცინები. სამოგზაურო მწვანე ბარათის ოფიციალური სახელწოდება იქნება – EU Digital COVID certificate (ევროკავშირის ციფრული კოვიდსერტიფიკატი). ინიციატივა ევროკომისიამ მარტში წარადგინა და მას შემდეგ განხილვები მიმდინარეობდა.