ევროკომისია – “თურქეთი სულ უფრო მეტად შორდება ევროკავშირს”

ევროკომისიის განცხადებით, თურქეთი, რომელიც ევროკავშირში გაწევრიანების კანდიდატი ქვეყანაა, სულ უფრო მეტად შორდება ევროკავშირს. ამის შესახებ ევროკომისიის ანგარიშშია ნათქვამი.

„ჩრდილოეთ კვიპროსის შემდგომი მილიტარიზაციის, პროჰამასის რიტორიკის გამო და ასევე არადემოკრატიული ნაბიჯების გამო დოკუმენტში ღრმა შეშფოთებაა გამოხატული,“ – აღნიშნულია ინფორმაციაში.

„თურქეთი სულ უფრო მეტად შორდება ევროკავშირს. თურქეთს არ შეუცვლია თავისი ნეგატიური ტენდენცია რეფორმების მიმართ, მიუხედავად იმისა, რომ ეს მისი ვალდებულებაა“, – ნათქვამია ანგარიშში.

ევროკომისიამ განაცხადა, რომ ანკარა რჩება მომზადების „საწყის ეტაპზე“ ისეთ სფეროებში, როგორიცაა სასამართლო სისტემა და კორუფციასთან ბრძოლა. ქვეყანა უარს ამბობს ადამიანის უფლებათა ევროპული სასამართლოს რამდენიმე გადაწყვეტილების შესრულებაზე.

ცნობისთვის, თურქეთმა პირველად 1987 წელს მიმართა მაშინდელ ევროპულ ეკონომიკურ თანამეგობრობას, მიიღო კანდიდატის სტატუსი 1999 წელს და დაიწყო მოლაპარაკებები 2005 წელს.