ევროკავშირის ლიდერებმა უკრაინისთვის €90 მილიარდი ევროს ($105 მლრდ. დოლარის) დახმარების გამოყოფაზე შეთანხმებას მიაღწიეს. არსებული ინფორმაციით, თანხა ომში მყოფი მოკავშირის 2026-2027 წლებში სამხედრო საჭიროებებს მოხმარდება.
ინიციატივის მხარდამჭერი სახელმწიფოები აიღებენ სესხს, რომელსაც უკრაინას უპროცენტოდ ასესხებენ. აღსანიშნავია, რომ ოფიციალურ კიევს სესხის გასტუმრების ვალდებულება იქამდე არ ექნება, ვიდრე რუსეთი უკრაინისთვის სამხედრო რეპარაციების გადახდას არ დაიწყებს. აქვე უნდა ითქვას ისიც, რომ სესხის აღებაზე და უკრაინისთვის თანხის გამოყოფაზე კატეგორიული უარი სამმა სახელმწიფომ, უნგრეთმა, სლოვაკეთმა და ჩეხეთმა განაცხადეს.
როგორც გადაწყვეტილების გამოცხადების შემდეგ ევროპელმა ლიდერებმა თქვეს, მოკავშირე ქვეყნისთვის $105 მილიარდის დახმარების გამოყოფა კიდევ ერთხელ ადასტურებს, რომ ევროკავშირი უკრაინის ერთგულ მხარდამჭერად რჩება და ეჭვები მათი რესურსების ამოწურვასთან დაკავშირებით რეალობას არ შეესაბამება.
რაც შეეხება ბელგიაში განთავსებულ $216 მილიარდის გაყინულ რუსულ აქტივებს, რომლის უკრაინისთვის გადაცემასაც ევროკავშირის არაერთი წევრი უჭერდა მხარს, ბელგიის პრემიერ-მინისტრი, ბარტ დე ვივერი კატეგორიულად შეეწინააღმდეგა. გავრცელებული ინფორმაციით, მან ევროპელ ლიდერებთან საუბრისას კონკრეტულ სამართლებრივ რისკებზე ისაუბრა და განაცხადა, რომ ქვეყანა მსგავსი მასშტაბის რისკს ევროპელი მოკავშირეების პირდაპირი გარანტიების გარეშე ვერ აიღებდა. როგორც გაირკვა, სწორედ გარანტიების გაცემის დეტალებზე ჩამოუყალიბებლობის გამო დაბლოკა ბელგიამ რუსული აქტივების გადაცემა. თუმცა საბოლოო დოკუმენტში ჩაიწერა, რომ $216 მილიარდი ისევ ბრიუსელში დარჩება და მათ რუსეთი იქამდე ვერ მიიღებს, ვიდრე უკრაინისთვის სამხედრო რეპარაციების გადახდას არ დაიწყებს.
Loading ...