ევროკავშირმა რუსეთის წინააღმდეგ სანქციების მეხუთე პაკეტი დაამტკიცა

ევროკავშირმა უკრაინაში შეჭრის გამო, რუსეთის წინააღმდეგ დაწესებული სანქციების მეხუთე პაკეტი დაამტკიცა. ამის შესახებ ინფორმაციას CNN-ი საფრანგეთის განცხადებაზე დაყრდნობით ავრცელებს, რომელიც ევროპის საბჭოს თავმჯდომარე ქვეყანაა.

მათივე ინფორმაციით, ახალი პაკეტი რუსული ქვანახშირის იმპორტის აკრძალვასა და რუსეთში იარაღის ექსპორტზე ემბარგოს მოიცავს. ამასთან, სანქციები მოიცავს რუსული გემებისთვის, ევროკავშირის პორტების დახურვასა და მაღალტექნოლოგიური პროდუქტების მოსკოვში ექსპორტის აკრძალვას.

როგორც CNN-ი იუწყება, სამართლებრივი ტექსტი, რომელიც მოიცავს ,,ოლიგარქების, რუსული პროპაგანდის მონაწილეების, უსაფრთხოებისა და სამხედრო აპარატის წევრების, სამრეწველო და ტექნოლოგიური სექტორის ერთეულების სახელებს” ოფიციალურად ხვალ გამოქვეყნდება.