"დღეს უფრო მძიმე სურათი გვაქვს" – გაძვირდება თუ არა საწვავი?

ნავთობიმპორტიორთა კავშირის ინფორმაციით, ბოლო ორი თვის განმავლობაში ბრენდირებულ და არაბრენდირებულ საცალო ქსელებში საწვავი საშუალოდ 30-დან 50 თეთრის ფარგლებში გაძვირდა, რაც ძირითადად საერთაშორისო ბაზარზე ნავთობპროდუქტებზე ფასების ზრდამ განაპირობა.
რა გავლენა ექნება გაუფასურებულ ლარის კურსს საწვავზე, ამის შესახებ “საქმის კურსთან”  “ვისოლის” გენერალურმა დირექტორმა, ვასილ ხორავამ ისაუბრა. 
„ლარის კურსს ყოველდღიურად ვაკვირდებით. როცა პროდუქციის იმპორტს აკეთებ, ძალიან მნიშვნელოვანია გაცვლითი კურსი. ის, რაც ბოლო დღეებში ხდება, ძალიან საზიანოა იმპორტირებული პროდუქციისთვის. ყველაფრის მიუხედავად, ჯერჯერობით ვინარჩუნებთ სტაბილურობას და ვცდილობთ შევინარჩუნოთ ფასები ბაზარზე, თუმცა ბოლო დღეებში არსებულ გაცვლით კურსს ვერ უგულებელვყოფთ.
სექტემბერში პროდუქტები განბაჟებული იყო 3,07-ზე, დღეს უფრო მძიმე სურათი გვაქვს და ეს ნიშნული აცდა 3,25-ს. ბუნებრივია, რომ ახალი განბაჟებული პროდუქცია იქნება გაზრდილი ფასით და საცალო ქსელშიც იქნება მომატებული პირობებით. მაქსიმალურად ვცდილობთ საცალო ქსელებში პროდუქტზე ფასები შევინარჩუნოთ, თუმცა ამავე დროს ვხედავთ, რომ ეს არ არის ორდღიანი ამოვარდნილი საცალო კურსი. ვარდნა უკვე ორი კვირაა გრძელდება, რაც ალბათ აისახება ნავთობპროდუქტების ფასებზე“, – განაცხადა ვასილ ხორავამ.

„ვისოლის“ ქსელში „ეკო სუპერი“ 2.38 ლარი ღირს; „ეკო პრემიუმი“ – 2.23 ლარი; „ევრო რეგულარი“ – 2,08 ლარი; „ეკო დიზელი“ – 2.25 ლარი; „ევრო დიზელი“ კი 2.20 ლარი.

www.bm.ge