დღეს, 16 ნოემბერს, თბილისის საქალაქო სასამართლოში გაიმართება სხდომა საქართველოს ექსპრეზიდენტ მიხეილ სააკაშვილის მიერ სახელმწიფო საზღვრის უკანონო კვეთის საქმეზე. მიხეილ სააკაშვილის ადვოკატ ბექა ბასილაიას ინფორმაციით, სხდომა 11:00 საათზეა დანიშნული.
საქართველოს პროკურატურამ სააკაშვილს სახელმწიფო საზღვრის უკანონო კვეთისთვის ბრალი წაუყენა 2021 წლის 20 ოქტომბერს. გამოძიების ინფორმაციით, სექტემბრის ბოლოს, მიხეილ სააკაშვილი უკრაინიდან საქართველოში ფარულად დაბრუნდა რძის პროდუქტებით დატვირთული ტრაილერით, რომელიც გემით ჩამოვიდა უკრაინის ჩერნომორსკის პორტიდან ფოთის ნავსადგურში. მძიმე დანაშაულის დაფარვის და საზღვრის უკანონოდ კვეთაში დახმარების მუხლებით ბრალდებულია ტრაილერის მფლობელი, ელგუჯა ცომაია. 1 ოქტომბერს პოლიციამ მიხეილ სააკაშვილი თბილისში, ცომაიას ბინაში დააკავა. ამავე საქმეზე, დანაშაულის დაფარვის მუხლით ბრალდებულია კიდევ 3 პირი.
ადვოკატი ბექა ბასილაია ვარაუდობს, რომ მიხეილ სააკაშვილს სასამართლოში არც დღეს მიიყვანენ, რადგან, ბასილაიას განცხადებით, ხელისუფლებას სასამართლო პროცესზე მიხეილ სააკაშვილის დასწრების ეშინია.
სპეციალურმა პენიტენციურმა სამსახურმა 10 და 15 ნოემბერს უარი თქვა მიხეილ სააკაშვილის მიყვანაზე თბილისის საქალაქო სასამართლოში, სადაც ამჟამად განიხილება ექსპრეზიდენტის წინააღმდეგ აღძრული კიდევ ორი საქმე – 2007 წლის 7 ნოემბრის საპროტესტო აქციის ძალით დაშლის და ტელეკომპანია „იმედში“ სპეცრაზმის შეჭრის გამო უფლებამოსილების გადამეტების და საბიუჯეტო თანხის, დაახლოებით 9 მილიონი ლარის გაფლანგვის ბრალდებები.
ორივე შემთხვევაში, პენიტენციურმა სამსახურმა სასამართლოში მიხეილ სააკაშვილის მიყვანაზე უარი ახსნა სახელმწიფო უსაფრთხოების სამსახურში(სუს) ხელისუფლების შეთქმულებით დამხობის მუხლით მიმდინარე გამოძიებით და ამ უწყების მიერ ოქტომბრის ბოლოს გავრცელებული განცხადებით და ფარული აუდიოჩანაწერებით, რომელთა თანახმად, სუს-ის ინფორმაციით, იგეგმებოდა მიხეილ სააკაშვილის პენიტენციურ დაწესებულებაში ეტაპირებისთვის ხელის შეშლა საავტომობილო გზების ბლოკირებით და უკონტროლო სიტუაციის და ქაოსის შექმნა.
პენიტენციურ სამსახურში აცხადებენ, ასეთივე ქმედებები შესაძლოა, იყოს სააკაშვილის სასამართლო დარბაზში ესკორტირების შემთხვევაშიც, ამიტომ მისი უსაფრთხოების საკითხებიდან გამომდინარე სასამართლოში მიყვანა გარკვეულ რისკებთანაა დაკავშირებული. გარდა ამისა, სპეციალური პენიტენციური სამსახური ამბობს, რომ ამ ეტაპზე მიხეილ სააკაშვილს შეწყვეტილი აქვს მკურნალობის არსებითი ნაწილი და სასამართლო პროცესზე მიყვანა და დასწრება წარმოადგენს დამატებით რისკს მისი ჯანმრთელობისთვის.
ექსპრეზიდენტის ადვოკატები და პირადი ექიმი ამბობენ, რომ მიხეილ სააკაშვილი მზად არის სასამართლო სხდომებში უშუალო მონაწილეობისთვის. ბრალდებს მხარე და სპეციალური პენიტენციური სამსახური აცხადებენ, რომ სააკაშვილს სასამართლო პროცესში მონაწილეობა დისტანციურად შეუძლია.
Loading ...
