სააპელაციო სასამართლოში დღეს მთავარი არხის გენერალური დირექტორის, ნიკა გვარამიას სასამართლო პროცესი გაიმართება. სხდომაზე მხარეები დასკვნითი სიტყვით წარსდგებიან.
დღესვე გახდება ცნობილი როდის გამოაცხადებს გადაწყვეტილებას მოსამართლეთა კოლეგია.
დაცვის მხარის დასკვნით სიტყვაში ყურადღება გამახვილდება იმ გარემოებაზე რითაც დასტურდება, რომ “მთავარი არხის” დირექტორს დანაშაული არ ჩაუდენია და რომ იგი პოლიტიკური ნიშნით ზის ციხეში.
“დღევანდელ სასამართლო სხდომაზე მხარეები წარვდგებით დასკვნითი სიტყვებით, ასევე დარჩენილი გვაქვს რეპლიკის ეპიზოდი, არ ვიცი, რამდენად მოესწრება ამ ყველაფრის გავლა ერთი სასამართლო სხდომის ფარგლებში. დასკვნით სიტყვაში, ბუნებრივია, ყურადღებას გავამახვილებთ იმ გარემოებებზე, რაც ცალსახად ადასტურებს, რომ რომ არათუ ნიკა გვარამიას არ ჩაუდენია დანაშაული, არამედ, ის ფაქტობრივი გარემოება, რომელსაც პროკურატურა აღწერს, საერთოდ არ წარმოადგენს დანაშაულს”, – თქვა დიტო საძაგლიშვილმა.
ნიკა გვარამიას საქალაქო სასამართლომ 3 წლითა და 6 თვით პატიმრობა 16 მაისს შეუფარდა. მას პროკურატურა ედავება ჯერ კიდევ “რუსთავი 2”-ის დირექტორობის დროს, სამაუწყებლო კომპანიის “კანონიერი ინტერესების საწინააღმდეგოდ უფლებამოსილების ბოროტად გამოყენებასა და მისი კუთვნილი დიდი ოდენობით თანხის სამსახურებრივი მდგომარეობით გამოყენებას”. ორგანიზაცია “საქართველოს დემოკრატიული ინიციატივის” მიერ სასამართლოდან გამოთხოვილი ინფორმაციით დადგინდა, რომ 2017 წლიდან 2021 წლის ჩათვლით, ამ მუხლით პატიმრობა არავისთვის აქვთ მისჯილი.
Loading ...