დუტა სხირტლაძემ ტელეკომპანია „იმედი“ დატოვა

ტელეწამყვანმა დუტა სხირტლაძემ ტელეკომპანია „იმედი“ დატოვა. აღნიშნული ინფორმაცია სხირტლაძის მეუღლემ, მარინა ნაცვლიშვილმა დაადასტურა.

„დიახ, გიდასტურებთ, ნამდვილად დატოვა ტელეკომპანია „იმედი“, – განაცხადა ნაცვლიშვილმა Ambebi.ge-სთან საუბრისას.

ცოტა ხნის წინ განცხადება გაავრცელა ტელეკომპანია “იმედმა” – “არხის დირექციის გადაწყვეტილებით, 10 დეკემბრიდან დუტა სხირტლაძე “ტელეიმედში” აღარ მუშაობს” – წერს ტელეკომპანია იმედი სოციალურ ქსელში.

მანამდე დუტა სხირტლაძე „ფეისბუქზე“ აქციის ერთ-ერთი მონაწილის,18 წლის ბიჭის დაკავებას გამოეხმაურა.

„ბავშვია, ბიჭო! ბავშვიიიიი! გამოუშვით! ჩემი მხარდაჭერა შენ, კარგო ბიჭო და ყველას ვინც ამ დღეებში უმოწყალოდ სცემეს (მათ შორის ჩემი უმცროსი კოლეგებიც). პატარა გოგო-ბიჭებს. ჟურნალისტებს, ოპერატორებს. ქვეყანა ამათია. შვილებისაა.

ვიღაცები „ბანდერლოგებს“ უწოდებენ. აი, ამათ. ქვეყანაზე უზომოდ შეყვარებულ ახალ თაობას. თავისუფლებაში დაბადებულებს. ამათი გონება რომ მოგცათ მაგინებლებს – ისე შეგრცხვებოდათ საკუთარი თავის. თუ არ გჯერათ – გაბედეთ და დაელაპარაკეთ. ნებისმიერს. თუმცა რაზე უნდა დაელაპარაკოთ. ბავშვები, შვილები, ახალი თაობა – ესაა ჩვენი საზრუნავი და ჩვენი მომავალი. ამათ ვერავინ მოერევა. ვერც ვერავინ მორევია. ვერასდროს“,- წერს დუტა სხირტლაძე.